РУБРИКАТОР
УЛУУ КЫАЙЫЫ 30 сылыгар
Австрияҕа диэри бойобуой массыынаҕа
Бу снимокка байыаннай грузовой массыына аттыгар бэйэтин бойобуой доҕорун кытты Курскай тоҕойтон Австрия сиригэр кыайыы кынаттанан тиийбит Илья Гаврильевич Колпашников турар. Илья Гаврильевич Австрияҕа диэри айана, охсуһуу толооно, элбэх бойобуой массыыналары солбуйан тиийдэ. Фроҥҥа өстөөх бултаһар сыала массыына. Ол кини олус наадалаах таһаҕаһы – ботуруону, снаряды, гранаталары таһара буолар. Төннөрүгэр бааһырбыт байыастары полевой госпиталларга тиэрдэр о.д.а. сорудахтары толорор.
Илья Колпашников хас да тегул чэпчэки бааһырыылары ылбыта. Кэнники атаҕынан ыараханнык бааһырбыта. Онтукатын дойдутугар кэлэн баран атаҕын быстарбыта, 1957 сыллаахха «Кыһыл дэриэбинэ» колхозка үлэлии сылдьан өлбүтэ. Илья Гаврильевич фронна сылдьыбыт бойобуой суолун туһунан ахтыы хаалларбатах. Фронтан 1946 сыллаахха «Албан аат» III степенэ орденнаах, «Хорсунун иһин», «Праганы босхолооһун иһин» медаллардаах кэлбитэ.
Киниэхэ сэрии бүтүүтүгэр бэриллибит I Украинскай фронт командующайа маршал Конев байыаннай советын чилиэнэ генерал-лейтенант Кропнюков илии баттааһыннаах бочуотунай грамота баар. Онно суруллубутунан Илья Гаврильевич сулууспалаабыт чааһа Курскай тоҕойтон саҕалаан Днепр өрүһү туораан, Киев куораты босхолоспут. Житомир, Ровно, Проскуров, Винница, Каменец-Подольскай, Ковель, Черновицы, Станислав, Дрогович, Львов куораттары босхолуур иһин сэриилэргэ кыттыбыт. Польшаны босхолоһон Германия территориятыгар Одер Нейссе өрүстэри туораабыттар. Праганы босхолоон Австрия сиригэй тахсан сэриини кыайыынан түмүктээбиттэр.
Дойдутугар үлэ-хамнас үөһүгэр түспүтэ. Ыал буолан хас да оҕоломмута. Билигин кини ыччаттара үлэһиттэр. Баара буоллар «эһээ» дэтиэ этэ. Кэргэнэ Варвара Николаевна М.Аммосов аатынан совхоз Кыһыл дэриэбинэ биригээдэтин биир бастыҥ үлэһитэ, цеховой партийнай тэрилтэ секретара, ССКП райкомун бюротын чилиэнигэр кандидат.
П.Сивцев.
Якутская АССР. Намский район Хатырыкский н/ср. Школы Колпашниковой Даша Петровной. Полевая почта 59916Е Колпашникова Илья Гавр.
Печати на конверте. Полевая почта СССР 17944 ПРОСМОТРЕНО Военной цензурой 19046
Штемпель. СССР 29.11.44. Намцы ЯАССР Нам.
11/XI – 44
Ытыктыыр, убаастыыр балтым Даша.
Дорообо. Аан бастаан миигиттэн эдэр ыччат итии бирибиэттэ тут Мин быйыл бэрт үчүгэйдик сылдьабын. Доруобуйа да кэминэн. Мин эн суруккун туттум бэрт үөрүүнэн уонна бэрт улахан баһыыба. Эһиги миигин умнубакка суруйбуккутугар. Мин эйигиттэн первый раз получил. Мин эйиэхэ хаста да ыыттым. Маанньаттан иккис суругун туттум. Өссө фото хаартыскатын туттум. Онон бэрт үөрүү и махтал эһиэхэ. Даша эһи миэхэ кимтэн сурук тутаҕыт да ол аадырыһын суруйар буолуҥ. Мин кинилэргэ суруйуом. Дьэ Даша мин билигин баарбын. Ньиэмискэй кыраныыссаҕа баарбын. Уонна туох үлэни биэрэллэр, этэр туох оруудуйаны биэрдилэр да ханна баҕар этэр сирдэригэр или үлэлэрин толорор сиргэ сылдьабыт. Сестра ваша биһиги рабочай Кыһыл армия инники кимэн киирэн иһэбит. ... сирдэргэ ньиэмский территорияҕа киирэн ыган турабыт. Күн аайы сэрии бүтэрин күүтэбит да билигин ол эрээри сотору бүтүө диэн буолар.
Дьэ сонун лабысха бүтэр. Сонун элбэх да суруйар сатаммат. Тыыннаах ордон дойдуну буллахха кэпсиэм. Бырыһаай, быраһаай, бакаа. УБАЙЫН ИЛЬЯ.