РУБРИКАТОР
СУРУЛЛУБУТУ СОНУРҔААН
Мин иллэрээ сыл Кыайыы бырааһынньыгын көрсө «Биир ырыаттан сэдиптээн» диэн билэр ветераннарбын санаан, ахтыы суруйан турабын. Тустаах Василий Егорович Колмогоров хайдах сэрииттэн төннөн иһэн, Тахтамыгда станцияҕа бииргэ дьиэлээн иһэр Сахатын сирин саллааттарын кытта «покупателлэртэн», ол эбэтэр, атын сиргэ араас үлэҕэ хомуйар дьонтон, ырыа көмөтүнэн босхоломмуттарын туһунан этэ. Ону бу ыстатыйабар хатыылаамыым дуу.
Ахтыыбын аахпыттар миигин бэйэбин да, Василий Егоровиһы билээччилэр да, син сэҥээрбиттэрин биллэртээбиттэрэ. Ол курдук биһиги улууспут биир киэн туттар киһитэ, норуот хаһаайыстыбатын үтүөлээх үлэһитэ, бөһүөлэкпитин, нэһилиэктэрбитин араас тутууларынан байыппыт, киэргэтиспит дьоннорбутуттан биирдэстэрэ, табаарыһым Анатолий Иванович Васильев кини кырдьаҕас күтүөтэ, Амма улууһугар судьуйанан үлэлээбит, эмиэ Улуу сэрии кыттыылааҕа ол ахтыллар түгэҥҥэ Тахтамыгдаҕа баара эбитэ үһүтүн туоһулаан соһутан, үөрдэн турар.
Анатолий Иванович күтүөтүгэр Аммаҕа күүлэйдии тиийэ сылдьыбытыгар киһитэ оруобуна мин ахтыым курдук түгэни кэпсээн туран, Василий Еоровиһы туоһулаһан турбут: «Баар дуо, тугу гынарый?» — эҥин диэн. Онно кини Василий Егорович биһиги оройуоммутугар бастакы секретардыырын, партия райкомугар, хас оҕолооҕун эҥин тугу билэринэн сэһэргээбит үһү. Онуоха киһитэ олус диэн үербүт уонна: «Ол иһин да, оннук буолуохтаах киһитэ оччоттон биллэрэ, олус сытыы-хотуу, үтүө көрүҥнээх, өйдөөх киһи этэ», - диэн астыммытын эппитэ үһү.
Дьэ, онон ахтыым туоһулардааҕыттан мин эмиэ астынаммын, аҕыйах түгэни аҕыннахпына сатаныыһы. Василий Егорович тапталлаах кэргэнэ, биэс оҕотун күн күбэй ийэлэрэ, биһиги улууспут эмиэ биир киэн туттар, ытыктыыр учуутала Мария Ивановна кэргэнин туһунан ахтыыларыгар аҕалара олус үчүгэйдик ыллыырын туһунан ахтар. Ону мин эмиэ бу ыаллар үөрүүлээх түгэннэригэр, булка-алка син үгүстүк алтыспыт киһи быһыытынан толору туоһулуубун. Василий Егорович дуоһуйдаҕына, иэйиитэ киирдэҕинэ: «Дьэ, доҕоттоор, маннык ырыа баара», - диэн баран Ленатын туһунан, били музыка эйгэтигэр этэллэринии, баархатынай-баритональнай куолаһынан ыллаан доллоһуттаҕына, эбэ хотун сылаас салгына сирэйгэр биллэргэ, сүрэххэр сөҥөргө дылы буолааччы.
Дэлэҕэ да Россия улахан суруйааччыта ыалдьыттыы сырыттаҕына «Мин олоҕу таптыыбын» диэн нуучча ырыатын ыллаабытыгар: «Мин дойдубар да бу ырыаны маннык дуоһуйа истибэтэҕим», - диэн хайгыа, сөҕүө-махтайыа дуо? Онон түмүктээн эттэххэ, Василий Егорович кэрэтин, дьоһунун таһынан өссө биир үтүө өрүтүн - үчүгэй ырыаһытын истибит эрэ туоһулуо, умнуо суоҕа диэн бигэргэтэбин.
Н. ГУРЬЕВ,
үлэ ветерана