РУБРИКАТОР
Колесов Николай Кузьмич
Колесов Николай Кузьмич 1914 сыллаахха ыам ыйыгар 1-гы Модут нэһилиэгэр, Тонышев диэн политсыылынай кэргэнигэр иккис оҕонон төрөөбүт. Сытыы-хотуу буола улаатан, 7 кылааһы бүтэрбит уолу учууталынан, бастаан 1931 сыллаахха Арбын нэһилиэгэр, онтон Хамаҕаттаҕа анаабыттар. 4 сыл үлэлээн баран, «Большевик» колхозка киирэн үлэлээбит.
Сэриигэ 1941 сыллаахха бастакы хомуурга түбэһэн барбыта. Анал сибээс үөрэҕэр үөрэнэн баран, аатырбыт И.С. Конев командующайдаах, 1-гы Украинскай фроҥҥа, онтон 1941-1945 сылларга генерал-лейтенант Задов армиятыгар, сибээс батальонугар строевой полкаларга связист, пулеметчик, разведчик быһыытынан сылдьыбыт. Волга өрүһү туораан Сандомир куораты босхолуур кыргыһыыга, Одер өрүһү туоруур охсуһууга, историяҕа киирбит Курскай тоҕойдооҕу кырыктаах кыргыһыыга, хорсуннук сэриилэһэр. Чехословакия столицата Праганы босхолоһор, немец фашистарын букатыннаахтык дьакыйыыга, Берлини ылыы иһин кыргыһыыга кыттар.
Н.К. Колесов туһунан Д. Избеков «Якутяне в боях за Родину» диэн кинигэтигэр (1966 с.) маннык суруллубута: «В боях за освобождение города Житомира сражались десятки якутян, в том числе Николай Кузьмич Колесов (Намский район). Находясь в составе 180-го стрелкового полка 129 дивизии, 29 декабря 1943 года в бою за город Житомир, будучи пулеметчиком, ворвался в расположение противника, ведя сильный пулеметный огонь, уничтожил 8 немцев и был тяжело ранен».
Бу ааттаммыт кыргыһыыларга кыттыбытын туоһутунан, Верховнай главнокомандующай И.В. Сталин 5 төгүл махтал суруга буолар.
Сэрии саҕаланыаҕыттан бүтүөр диэри, уот охсуһууга сылдьан, үс төгүл бааһыран, кыайыы көтөллөнөн, дойдутугар эргиллэн кэлэн колхоз, кэлин совхоз үлэтигэр күүһэ кыайарынан үтүө суобастаахтык, араас үлэҕэ үлэлээбитэ.
Наҕараадалара: Аҕа дойду Сэриитин I степеннээх ордена, Албан аат III степеннээх ордена. Мэтээллэр: «Хорсунун иһин», «Праганы босхолооһун иһин», «Берлины ылыы иһин», «Германияны кыайыы иһин».