РУБРИКАТОР
КОЛЕСОВ ИВАН МИХАЙЛОВИЧ
Мин 1941 сыл атырдьах ыйыгар «Коминтерн» колхозка биригэдьиирдии сылдьан армияҕа ыҥырыллыбытым. Арҕаа Украинскай фроҥҥа тиийбитим. 1943 сыл от ыйыгар Александровскай дэриэбинэ иһин улахан кыргыһыы буолбута. Онно элбэх самолет, танка уонна уон биир «Катюша» көмөлөспүтэ. Онтон ыла, биһиги сэриилэрбит кыайан Белгородка тиийэ барбыппыт. Ити сыл атырдьах ыйыгар Белгород куораты босхолооһуҥҥа мин табаарыстарым элбэх саха уолаттара өлбүттэрэ. Кинилэр истэригэр Софронов диэн Амма киһитэ баара.
Биир дэриэбинэни ылыыга биһиги пулеметтар обороналарын ылбыппыт. Мин онно иккис наводчигынан сылдьыбытым. Биһигини төгүрүйэн ылбыттара, ону биһиги тоҕо көтөн тахсыбыппыт. Ити кыргыһыыга бастакы наводчик Казахстан уола өлбүтэ. Онон соҕотох ордон хаалбытым. Уопсайынан, 160 киһилээх ротаттан 30-ча эрэ киһи ордубута, олор истэригэр бааһырбыттар бааллара. Белгороды босхолооһун иһин командующайбытын Ватутины Ленин уордьанынан наҕараадалаабыттара. Саллааттарга, отделение командирыгар Сталин махтал суругун аахпыттара.
Онтон мин Харьков туһаайытыгар атахпар бааһырбытым. Госпитальга киирбитим. Үтүөрэн госпиталтан тахсан баран, Смоленскай анныгар улахан кыргыһыыга кыттыбытым. Бастаан пехотанан баран иһэн танкаҕа олорбуппут. Харьков анныгар сүрдээх улахан хапсыһыылаах кыргыһыы буолбута. Онно биир улахан түбэлтэҕэ мин төбөбөр баас ылбытым.
1944 с.
бэс ыйыгар, төбөбөр ылбыт бааһырыыбынан сыыйыллан, дойдубар эргиллэн
кэлбитим, балтараа сыл «Коминтерн» колхоз председателинэн Кайгородов
Степан Николаевич үлэлиирэ. Мин колхоз председателин кытта сүбэлэһэн,
райсовет председателин Окоемовы кытта кэпсэтэн, биир сыл иһигэр оскуола
тутуспутум. Аҕа дойду сэриитин кыттыылаахтарын ааттарыттан, мин
ыччаттарга үчүгэй доруобуйаны баҕарабын, кэскиллээх дьон буоларгытыгар!
Ахтыыны оҥордо «Хорсунун иһин» медаль кавалера Колесов Иван Михайлович (Нуучча
Уйбаан)
1975 с.
муус устар 28 к