АХТАН ААhАР ЫТЫК ИЭСПИТ

 Биһиги аҕабыт, эһэбит колхоз тутуутун ветерана, Аҕа дойду сэриитин кыттыылааҕа Колесов Иван Михайлович 1906 с. кулун тутар 4 күнүгэр Көбөкөн нэһилиэгин «Куокуй» диэн учаастакка төрөөбүтэ. Бастакы колхозтары тэрийии саҕана 1931 с. Куокуй учаастагар 15 хаһаайыстыбаны холбоон «Савва» диэн колхоһу тэрийсибитэ манна колхоз председателинэн, биригэдьииринэн, суоччутунан үлэлээбитэ. 1936 с. бастакынан стахановец аатын ылбыта, Бөдөҥсүйбүт «Коминтерн» колхозка биригэдьииринэн үлэлии сылдьан 1941 с. сэриигэ ыҥырыллыбыта. Көбөкөн нэһилиэгиттэн барыта 129 киһи ыҥырыллыбыта, олортон 71 киһи кыргыһыы толоонуттан эргиллибэтэҕэ.

Аҕабыт 1942 сылга Смоленскай аннынааҕы кыргыһыыга сылдьыбыта. 1944 сыллаахха төбөтүгэр ыараханнык бааһыран сэрииттэн эргиллибитэ. «Хорсунун иһин», «Германияны кыайыы иһин», «1941-1945 үлэҕэ килбиэнин иһин» медалларынан наҕараадаламмыта. Сэрии толоонуттан кини бииргэ төрөөбүттэрэ Бүөтүр, Сэмэн, Прокопий Колесовтар эргиллибэтэхтэрэ. Салгыы аҕабыт Кыайыы 30 сылын көрсө хаалларбыт ахтыытын суруйабын:

«...Мин арҕаа Украинскай фроҥҥа тиийбитим. 1943 с. от ыйыгар Александровскай дэриэбинэ иһин улахан кыргыһыы буолбута. Онно элбэх самолет, танка уонна биир «Катюша» көмөлөспүттэрэ. Мантан ыла сэриибит Белгородка тиийэ барбыта. Ити сыл Белгород куораты босхолооһуҥҥа улахан кыргыһыы буолбута. Бу кыргыһыыга үгүс саха уолаттара, табаарыстарым өлбүттэрэ. Кинилэр истэригэр Софронов диэн Амма киһитэ баара. Биир дэриэбинэни ылыыга биһиги пулеметтар обороналарын ылбыппыт, онно мин иккис наводчигынан сылдьыбытым. Өстөөх сэриитэ төгүрүйбүтүн тоҕо көтөн тахсыбыппыт, 160-ча байыастан 30-ча эрэ киһи ордубуппут. Бу куораты босхолооһун иһин хамандыырбыт Ватутин Ленин орденынан наҕараадаламмыта. Байыастарга, отделение хамандыырыгар Сталин махтал суругун аахпыттара. Онтон мин Харьков туһаайыытыгар атахпын бааһырдан госпитальга киирэн эмтэнэн баран, Смоленскай анныгар улахан кыргыһыыга кыттыбытым. Манна биир улахан кимэн киирии кэмигэр төбөбөр бааһырбытым.