РУБРИКАТОР
ТӨРӨППҮТТЭРИМ
Мин аҕам Колесов Афанасий Осипович — Кычы 1916 с. Нам оройуонун Көбөкөн нэһилиэгэр төрөөбүт. 1942 с, Нам оройуонун Фрунзе нэһилиэгэр олохтоох сэбиэт председателинэн үлэлии олорон, сайын Кыһыл аармыйаҕа ыҥырыллар. Сталинградскай фроҥҥа сулууспалыы сылдьан ылбыт бааһыттан 1943 с. алтынньы 3 күнүгэр Пермскэй уобалас Березники куорат байыаннай госпиталыгар сытан өлбүт. (ЭГ-44)
Ийэм Колесова Матрена Ивановна 1916 с. Нам оройуонун Көбөкөн нэһилиэгин Харыйалаах бөһүөлэгэр төрөөбүт. Үлэ, тыыл ветерана, сэрии кыттыылааҕын огдообото. Сааһын тухары «Коминтерн», «Коммунизм» колхозтарга сүөһү көрүүтүгэр, кыһынын оҕуһунан от тиэйиитигэр үлэлээбит. Кэлин Нам сэлиэнньэтин бытовой комбинатыгар үлэлээбитэ. «Ветеран труда», «40 лет Победы ВОВ», «50 лет Победы ВОВ», түөскэ кэтиллэр «Ветеран тыла», «Кыайыы 50 сыла» мэтээллэринэн уонна бэлиэлэринэн наҕараадаламмыта, коммунистическай үлэ ударнига этэ. Ийэм 1996 с. күн сириттэн күрэммитэ.
Аҕам, ийэм сырдык мөссүөннэрэ үйэ-саас тухары өлбөөдүйбэт.
Василий Колесов,
уоллара