РУБРИКАТОР
Эһэбит сырдык аатын ыччаттара умнубаппыт
Биһиги эйэлээх олохпут туһугар сырдык олохторун толук ууран сэриилэспит дьоннортон биирдэстэрэ биһиги эһэбит Колесов Афанасий Данилович буолар. Эһэбит 1910 сыллаахха Нам оройуонун Арбын нэһилиэгэр Данил Маркович уонна Екатерина Спиридоновна дьиэ кэргэнигэр иккис оҕонон төрөөбүт. Биһиги эбэбитин Екатерина Потаповнаны кытта 1933 сыллаахха ыал буолбуттар. Эһэм 7 кылаас үөрэхтээх эбит, сэрии инниҥэр Ворошилов аатынан холкуоска кыладыапсыгынан үлэлээбит. Киһи быһыытынан сүрдээх холку, хаһан да кыыһырбат, сымнаҕас, дьиэ кэргэниҥэр эйэҕэс, оҕомсох киһи эбитэ үһү. 1937 сыллаахха эбэбинээн иккиэн Булуҥҥа киирэн балыкка үлэлээбиттэр.
Саҥа ыал буолан олохторун оҥостон истэхтэринэ сэрии саҕаланар. Эһэм 1941 сыллаахха атырдьах ыйын 8 күнүгэр маҥнайгы хомуурга ыҥырыллан, икки оҕолоох кэргэнин хаалларан сэриигэ барбыта. Үс оҕо төрөөбүтүттэн икки оҕо хаалбыт, мин ийэм Аньыыска 1935 с, таайым Киэсэ 1938 с. Ийэм аҕата сэриигэ барарыгар суох эбит, оҕолору кытта ол күн хаптаҕастаан сии баран хаалбыт. Инньэ гынан эбэм олус хомойоро бэстилиэнэйин аҕатын көрбөккө хаалта диэн. Оччолорго кини 5-тээх кыыс буоллаҕа дии. Аҕата букатыннаахтыы барбытын хантан билээхтиэй. Кэлин ийэм аҕам баара буоллар биһиги олох атын олохтонуо этибит диирин элбэхтэ истибитим. өр кэмҥэ эһэбиттэн сурук олох кэлбэт эбит. Эбэбит сурук суруйдаҕына эппиэтэ биирдэ эмит кэлэр үһү, онтон кэлин олох да эппиэт кэлбэтэх. Бастакы суругар балаһыанньа ыараханын, хаппыысталаах уунан аһыылларын, киһи бөҕө өлбүтүн туһунан суруйбут. Суругар наар оҕолоргун харыстаа, үөрэхтээх дьон оҥортоо диэн суруйар эбит. Мин эһэм 2 кыра лоскуй суруктара баарын аахпыт дьоллоохпун. Кэлин ол суруктар тоҕо эрэ сүтэн хаалбыттар. 1943 с. кыһын эһэбит сураҕа суох сүппүтүн туһунан хара сурук кэлбит. Докумуоҥҥа сурулларынан, 1945 сыллаахха эһэбит Колесов Афанасий Данилович от ыйын 5 күнүгэр сураҕа суох сүппүтүн туһунан билбиппит. Бастаан Уралга байыаннай чааска үөрэнэн баран, фроҥҥа барбыт эбит. Ханнык сиргэ тиийбитэ, ханна сэриилэспитэ биллибэт. 1995 сыллаахха «Память книга-мемориал воинам якутянам, погибшим и умершим в госпиталях в годы ВОВ 1941-1945 гг.» суруллубутунан, 05.07.43 Курскай уобалас Гнилец диэн дэриэбинэҕэ көмүс уҥуоҕа хараллан сытар. Кыайыыны уһансыбыт ытык дьоммутугар үйэбит-сааспыт тухары биһиги махтаныах тустаахпыт. Эһэбит сырдык аатын мэлдьи сүгүрүйэр гына салгыы ыччаттарбытыгар тириэрдиэхтээхпит диэн кыра ахтыыбын түмүктүүбүн.
Надежда Ивановна Колесова,
сиэнэ