РУБРИКАТОР
КЭРИЭСТЭБИЛ
Сэтинньи 24 күнүгэр биһиги аҕабытын Николай Лазаревич Карамзины күн сириттэн сүтэрбиппит номнуо биир сылын туолла.
Аҕабыт муус устар 15 күнүгэр Уус-Алдан Лөгөй нэһилиэгэр төрөөбүтэ. Бииргэ төрөөбүт 6 уол, 2 кыыс дьонноро сэрии иннинэ Намҥа Партизан бөһүөлэгэр көһөн киирбиттэр. 1941 сыллаахха улахан убайдара Карамзин Егор Лазаревич Дьокуускайтан үөрэнэ сылдьан сэриигэ барбыт. 1943 сыллаахха биһиги аҕабыт быраатынаан Намтан сэриигэ барбыттар. Николай Лазаревич 1950 сыллаахха дойдутугар кэлбитэ, ити сыл мясомолпромҥа үлэҕэ киирбитэ. Манна кини үлэтигэр үчүгэй үлэһитинэн биллибитэ. 1953 сыллаахха Ленскэй сэбиэт депутатынан талыллыбыта. Ити сыл Вологда куоракка мясомолпром директорын үөрэҕэр ыыппыттара. Үөрэҕин бүтэрэн баран Өлүөхүмэ куоратыгар үс сыл мясомолпром директорынан үлэлээбитэ. 1957 сылтан Намнааҕы мясомопром экономиһынан пенсияҕа тахсыар диэри үлэлээбитэ. Бу үлэлиир сылларыгар үлэтигэр үтүө суобастаахтык үлэлээбитэ. Мясомолпромҥа партийнай тэрилтэ секретарынан 10 сыл үлэлээбитэ.
1966 сыллаахха үлэлэригэр үрдүк ситиһиилэрин иһин Верховнай Совет президиумун бочуотунай грамотатынан наҕараадаламмыта. 1979 с. Дьокуускайдааҕы мясомолпром бочуотунай кинигэтигэр Карамзин Николай Лазаревич аата суруллубута. 1995 с. Нам бочуотунай гражданинын аатын ылбыта. 1966 с. «Отличник труда» значогунан наҕараадаламмыта. Сэриигэ ылбыт 11 мэтээл, 1 орден наҕараадалардаах.
Биһиги аҕабыт олус сэмэй, хаһан да бу наҕараадаларынан, грамоталарынан кэпсэммэт киһи этэ. Отут түөрт сыл устата биирдэ да бюллетенинэн туһамматаҕа. Дьиэҕэ хаһан да кыыһырар диэни билбэт киһи этэ. Мин куртахпынан ыалдьан курортка барбытым, биир ый буолан кэлбитим, онно оҕолорун кытта бэрт үчүгэйдик көрөн, көтөҕө-сүгэ сылдьан үлэтигэр үлэлээбит этэ. Аҕабыт олорбут олоҕор үчүгэйдик үлэлээбит, сылдьыбыт кэмнэрин элбэх бочуотунай грамоталар, эҕэрдэ суруктар туоһулууллар. Биһиги аҕабытын олус убаастыыбыт, ытыктыыбыт. Кини дууһата ол дойдуга үчүгэйдик сырыттын. Быдан дьылларга быраһаай, аҕабыт!
Кэргэнэ, оҕолоро, аймахтара