РУБРИКАТОР
КАЙГОРОДОВ ИГНАТИЙ ИННОКЕНТЬЕВИЧ
Аҕа дойду Улуу сэриитин ветерана, «Албан Аат» уордьан кавалера, 1908 сыллаахха Нам оройуонун Көбөкөн нэһилиэгэр дьадаҥы дьиэ кэргэҥҥэ төрөөбүтэ. Игнатий аҕата Иннокентий Иванович-Дьаллаха Харыйалаах төрүт олохтооҕо, миэлиҥсэҕэ өр кэмҥэ үлэлээбит. Ийэтэ Дария сүөһү көрүүтүгэр үлэлээбитэ.
1932 сыллаахха «Уйбааҥка» колхуос тэриллибитигэр, Кайгородовтар хас даҕаны сүөһүнү, сылгыны холбоон колхуос чилиэнэ буолбуттар. Игнатий, оччолорго сытыы-хотуу киһи, биригэдьииринэн үлэлээбит. 1939 сыл «Куокуй», «Уйбааҥка», «Чөмчөҕөй» колхуостар холбоһон «Коминтерн» колхуос буолбуттар. Онно Игнатий кадровай булчутунан үлэлээбит.
Наҕараадалара: «Албан Аат» III ст. уордьан, «Германияны кыайыы иһин» мэтээллэр.
1941 сыл Аҕа дойду Улуу сэриитэ саҕаланаатын кытары, от ыйын саҥатыгар аҕабыт, эһээбит Игнатий Харыйалаах үгүс ыччаттарын кытары, сэриигэ барбыта. Улахан эдьиийбит Колесова Анна Ивановна аҕабыт ахтыы биэрэрин истибит, кини кэпсииринэн Сталинград аттынааҕы дэриэбинэҕэ, уоттаах сэриигэ сылдьыбыт. Игнатий сэриигэ баран, илиитигэр, атаҕар араанньа буолан, аҥар хараҕынан көрбөт буолан 1943 сыллаахха дойдутугар эргиллэн кэлэр. Түөһүгэр «Албан Аат» уордьаннаах, «Хорсунун иһин», «Германияны кыайыы иһин» мэтээллэрдээх кэлбитэ. Кэлээт колхуоһугар ревизионнай комиссия председателинэн үлэлээбитэ.
«Игнатий Иннокентьевич кырдьар сааһыгар диэри кадровай булчутунан үлэлээн сэрии сылларыгар, сэрии кэннинээҕи ыар сылларга даҕаны нэһилиэгин дьонун, аймахтарын аһынан, түүлээҕинэн хааччыйан өлөртөн быыһаабыта», - диэн нэһилиэк төрүт олохтоох кырдьаҕастара билиҥҥэ диэри махталлара улахан. Кэнники сылларга булчут алыптаах дьарыгар, ис кистэлэҥэр, сиэри-туому тутуһууга Жирков Лаврентий Яковлевыһы үөрэппитэ.
Игнатий
Иннокентьевич - сэриигэ ылбыт араанньаларыттан 1975 с. ыалдьан өлбүтэ.
Анна Константиновна оҕолорун, сиэннэрин атахтарыгар туруоран, сорох хос
сиэннэрин көрөн 1994 с. 81 сааһыгар өлбүтэ.
Ахтыыны суруйда кыыһа Зоя Игнатьевна Кайгородова,
РФ кинематографиятын бочуоттаах үлэһитэ,
СР киинэтин ветерана