РУБРИКАТОР
Мин хос эһэм Германияҕа тиийэ сэриилэспитэ
Мин хос эһэм Жирков Яков Павлович сэрии кэнниттэн төннөн кэлээт да, биригээдэ ханнык баҕарар үлэтигэр актыыбынайдык кыттан барбыта. Кини кыһынын булчутунан, сайынын окко, кэлин ферма бостуугунан эҥкилэ суох үлэлии сылдьан пенсияҕа тахсыбыта. Пенсияҕа да таҕыстар Намҥа кыыһыгар олорон райком хонтуоратыгар хас да сыл үлэлээбитэ. Мин эһэм дьоммор кэлин бу курдук кэпсиирэ:
«...1942 сыллаахха от ыйыгар армияҕа ыҥырыллан, бастаан Челябинскай куоракка өстөөҕү кыргарга үөрэнэн баран 1 Украинскай фроҥҥа пехотаҕа сэрииһитинэн сылдьыбытым, ол курдук улахан куораттары: Варшаваны, Праганы босхолооһуҥҥа уонна өстөөх ордуутун Берлин куораты ылыыга кыттыбытым. Ол тиһэх кыайыыга кыттыбыт үөрүүбүтүн үөрэҕэ суох дьоннор, биһиги, кыайан сааһылаан кэпсиир кыахпыт суох. Бэл оччотооҕуга: «Кыайыы! Урааа!» - диэнинэн эрэ бэлиэтиир этибит. Оттон оччолорго Ийэ дойдубутун көмүскүүр санаабыт баһыйан, күүс укпута эбитэ буолуо, босхолуу-босхолуу ааспыт ахсаана биллибэт элбэх кыра куораттарбытын, дэриэбинэлэрбитин, станцияларбытын санаатахпына уонна биэс төгүл баас ылан баран кыргыһыыга хат-хат киирэрбин өйдөөтөхпүнэ куйахам күүрэр, сүрэҕим ытырбахтыыр...»
Хос эһэм Яков Павлович сэрии сылларыгар «Хорсунун иһин», «Бойобуой үтүөлэрин иһин!», «Аҕа дойду сэриитигэр килбиэннээх үлэтин иһин» мэтээллэринэн наҕараадаламмыта.
Кэлин сэрии инбэлиитэ буолан да баран государствоҕа элбэх күндү түүлээҕи бултаан туттаран бэйэтин көмүс кылаатын киллэрсибитэ.
Эһэм Жирков Яков Павлович 1971 сыллаахха өлбүтэ.
Станислав Бугаев,
Арбын орто оскуолатын 11 кылааһын үөрэнээччитэ
2005 с.