РУБРИКАТОР
СЭРИИ – ДЬИЭ КЭРГЭНИМ ДЬЫЛҔАТЫГАР
Хос эһэм Константин Прокопьевич 1915 сыллаахха төрөөбүт.
1932 сыллаахха 7 кылааһы бүтэрэн, «Кыһыл сулус» колхозка председателинэн үлэлээбитэ.
1933 сыллаахха РАЙСО-ҕа инструкторынан үлэлээбитэ. 1941 сыллаахха «Кэҥкэмэ» колхозка председателлии сылдьан, 1942 сыл атырдьах ыйын 15 күнүгэр ; сэриигэ ыҥырыллыбыт. Кини сэриигэ тиийэн биир эрэ суругу суруйбут. Кэргэнэ икки оҕотунаан тулаайах хаалбыттара. Кини өр сылларга колхозка ыанньыксыттаабыта.
Аҕам эһэтэ — Жирков Федот Гаврильевич. Таастаахха Жирков Гаврил дьиэ кэргэнигэр төрөөбүтэ. Бииргэ төрөөбүттэр 9-лар эбит. Сэриигэ Жирковтартан Гаврил, Степан уонна Петр барбыттар.
Жирков Гаврил Гаврильевич Таастаах оскуолатын бастакы директорынан үлэлээбитэ. Аармыйаҕа 1942 сыллаах сайыныгар ыҥырыллыбыта. Калининскай уобалаһы босхолуур кыргыһыыларга кыттыбыта. Гаврил Гаврильевич суруйбут суругуттан: «Окуопаттан суруйдум. Аттыбар буомба, снаряд эстэр, халлааҥҥа самолеттар. Сир титирэстиир, буулдьалар кыыһыраллар. Барыгытын ууруубун. Гвардейскай привети кытта, Гаврил 23.03.43 с». Кини 11-с морской биригээдэ састаабыгар сэриигэ киирбитэ. Бу биригээдэ Тихэй океан моряктарыттан тэриллибит ударнай байыаннай күүс этэ. Сталинград кыргыһыытыгар ыытан, кыайан-хотон гвардейскай аатын ылан тахсыбыта. 1943 с. саас сэриигэ сылдьан партия чилиэнэ буолбута.
1943 с. Первай Маайы Великие Луки оройуонугар көрсүбүтэ: «Маайы бу дойдуга үөрэ кэпсээбит олохпор атаардым. От-мас көҕөрөн эрэр. Бүгүн кэҕэ куолаһын истэн дойдум, Таастааҕым, дьоллоох сааһын санаатым, алааспар сылдьар курдук сананным. Эйиэхэ маҥнайгы кус кэлбитэ буолуо... Саас кустуур үчүгэй да буолара...».
Ийэ дойдуга таптал төрөөбүт алаастан саҕаланар. Гаврил суругун аайы алааһын ахтыбат түгэнэ суох. Кини суруйбут суруктарын аахтахха, биһиги санаабытыгар, модун санаалаах, хорсун саллаат мөссүөнэ арыллар: «Тапталлаах ийэм, быраһаай, эргиллэн кэлиэхпэр диэри! Уолуҥ Ийэ дойду көҥүлүн иһин охсуһуу хонуутугар барарыттан санааҕын мүнүүтэҕэ да түһэримэ. Ийэ дойдуну көмүскэлин иһин эппинэн-хааммынан төлүүр дойду чиэһин иһин үрдүк санааны кытта өллөҕө диэн кытаанах санааны ылынар уонна тыыннааҕын тухары аччыгый уолгунан киэн туттаар». Жирков Гаврил Гаврильевич 21 саастааҕар Ийэ дойдутун көмүскэлигэр бэйэтин сырдык олоҕун толук уурбута, сэрии толоонугар сураҕа суох сүппүтэ
Г.Г. Жирков бииргэ төрөөбүт убайдара: Жирков Петр Гаврильевич, 1906 сыллаах төрүөх. Сэриигэ 1942 сыллаахха ыҥырыллыбыта. Берлини ылыыга кыттыбыта, 1945 сыллаахха дойдутугар эргиллибитэ. 1982 сыллаахха ыалдьан өлбүтэ.
Жирков Степан Гаврильевич, 1914 сыллаах төрүөх. Сэриигэ 1941 сыллаахха ыҥырыллыбыта. 1943 сыл олунньу 23 күнүгэр кыргыһыыга хорсуннук өлбүтэ. Смоленскай уобалас Агафино сэлиэнньэтигэр көмүллүбүтэ.
Оттон хос эһэм Жирков Федот Гаврильевич сэрии кэмигэр Уус-Майаҕа көмүс сууйуутугар сылдьыбыта. Кини икки бырааттара Ньукулай уонна Байбал сэрии кэмигэр Таастаахха «Өктөөп уота» колхозка үлэлээбиттэрэ.
Биһиги дьиэ кэргэҥҥэ аймахтарбыт тустарынан өссө да элбэҕи билэ сатыыбыт. Кинилэр тустарынан умнубат буолуу — биһиги ытык иэспит.
Шура ЖИРКОВА,
Н.С. Охлопков аатыпан Нам улуустааҕы гимназия 9-с кылаас үөрэнээччитэ