РУБРИКАТОР
ГВАРДИЯ СЕРЖАНА ЖИРКОВ АХТЫЫТА
Нам оройуонун Хамаҕатта нэһилиэгиттэн 1943 сыл бэс ыйын 21 күнугэр Армияҕа ыҥырыллан илиҥҥи кыраныыссаҕа сулууспалаабытым.Онтон арҕааҥы фроҥҥа ыыппыттара. Оһуобай Приморскай армия М.И. Калинин аатынан Кыһыл Знамялаах Суворов орденнаах гвардейскай мотострелковай Таманскай дивизия 890-с горнострелковай полкатын 1-кы батальонугар түбэспитим.
Ахсынньыга Крым тумул арыытыгар десанынан түспүппүт. Ити кэмҥэ Крым барыта өстөөх илиитигэр этэ. Керчь герой-куораты төттөрү-таары ылсыыга бэрт элбэх хаан тохтуулаах улахан кыргыһыы кэнниттэн, муус устар 11 күнүгэр босхолоон, салгыы кимэн киирэн испиппит.
Евпаторияны, Симферополы, Феодосияны, Алуштаны, Ялтаны ылыыга кыттан, өстөөх саамай тиһэх күүстээх оборонатыгар - Сапун хайа анныгар тиийэн тохтообуппут.
Өстөөх Севастопольга киллэримээри, улахан күүһү муспут этэ. Бу Сапун хайаны 1944 сыллаахха ыам ыйын 7 күнүгэр штурмалаан ылбыппыт.
Севастополы ылыыга эмиэ улахан хаан тохтуулаах, кыргыһыы буолбута. Куорат илииттэн-илиигэ хас да төгүл төттөрү-таары киирбитэ сир ньуура көстүбэт гына киһи өлүгүнэн, сэрии сэбинэн, хаанынан кытары, буруонан-уотунан сир-халлаан көстүбэт гына бинр кэм уһуура-оргуйа олороро.
Биһиги өлбүт дьонунан, техниканан хаххаланан, «За Родину! За Сталина! Ураа!» диэн хаһыытаабытынан өстөөх оборонатын утары сүүрэн испиппит. Эмискэ атаҕым аһый гынаат, охтон түһэбин. Уллукпунан буулдьа нөҥүө тахсан, босхолоспут куораппар Ялтаҕа түөрт ый эмтэммитим.
Ол кэнниттэн Новороссийскайга (эмиэ герой-куорат) 984-с туспа артиллерийскай биригээдэҕэ минометчигынан куорат оборонатыгар сулууслалаабытым. Севастополы ылыы иһин «Бойобуой үтүөлэрин иһин» медалынан наҕараадаламмытым.
Дойдубар 1948 сыллаахха демобилизацияланан кэлбитим. Кыратык сынньана түһээт, 4-6 көлөнөн тутуу маһын (оскуола, кулууп тутуутугар) тиэйиитигэр, хотон маһын таһыытыгар, түүннэри-күнүстэри үлэлиирбит.
Тутууга хас да сыл үлэлээбитим кэннэ механизация оскуолатыгар үөрэххэ ыыппыттара. Үөрэнэн, ДТ-54 тракторга үлэлии сырыттахпына С-100 диэн улахан трактор биэрбиттэрэ. 12 сыл устата кыһынын стоговоһунан от тиэйиитигэр, сайынын сир хорутуутугар күнүстэри-түүннэри сменанан үлэлиирбит. «Бастыҥ тракторист» вымпелынан, аатым суруллубут чаһыынан, люстранан, мотоциклынан, хаста да харчынан бириэмийэлээбиттэрэ.
Г. Жирков,
сэрии, үлэ ветерана, гвардия сержана