РУБРИКАТОР
КРЫМЫ БОСХОЛООҺУҤҤА
Ганя Жирков сэрии саҕаланыытыгар уон биэстээх уолчаан этэ. Кини ити сылларга Легган аатынан колхозка ытык сэриигэ барбыт дьону солбуйан араас үлэҕэ сылдьыбыта. 1943 сыл сааһыгар Ганя 18-һын туолаат армияҕа ыҥырыллыбыта.
Илиҥҥи кыраныыссаҕа тиийэн үөрэнэн баран арҕаа фронт диэки айаннаабыттара. Гаврил Жирков ол туһунан маннык суруйар:
«Биһиги отдельнай Приморскай армия М. И. Калинин аатынан Кыһыл Знамялаах, Суворов орденнаах мотострелковай Таманскай гвардейскай дивизия 890 горно-стрелковай полкатытар бастакы батальон маҥнайгы ротатыгар түбэсггитим. Бастаан сэрии уотун Крым арыы тумулун штурмалааһыҥҥа десанынан түһэн көрсүбүтүм. Бэрт элбэх сүтүктэнэн, кыра лоскуй сири өстөөхтөн ылан оборонаҕа олорбуппут. Муус устар 11 күнүгэр уопсай кимэн киирии буолбута. Ити күн билиҥҥи герой-куораты Керчи босхолоон иннибит диэки Крым элбэх нэһилиэнньэлээх пууннарын, куораттарын элбэххаан тохтуулаах кыргыһыыларынан ылан соҕуруу диэки кимэн испиппит. Севастопольга киириигэ өстөөх элбэх күүһүн, техникатын үлтү кумалаан штурмалаан ыам ыйын 7 күнүгэр Сапун-гораны босхолообуппут. Мин ити кыргыһыыга атахпар бааһырбытым. Ялтаҕа госпитальга түөрт ый эмтэнэн үтүөрбүтүм. «Бойобуой үтүөлэрин иһин» медалынан наҕараадаламмытым».
Ити кэнниттэн Гаврил Гаврильевич Жирков 82 мм уонна 122 мм минометтарга наводчигынан сылдьыбыта.
Сэрии бүппүтүн кэннэ Гаврил Жирков байыаннай сулууспаҕа хаалларьшлыбыта. Кини дойдутугар 1948 сыллаахха эргиллибитэ. Ити кэмтэн ыла Ленин аатынан колхозка, билигин «Нам» совхоз Хамаҕаттатааҕы отделениетын производствотыгар активнайдык үлэлээбитэ.
П. Сивцев