РУБРИКАТОР
Мин абаҕам Япония сэриитин кыттыылааҕа
Иванов Афанасий Иннокентьевич 1927 сыллаахха Нам оройуонун Арбын нэһилиэгэр дьадаҥы холкуостаах дьиэ кэргэҥҥэ үһүс оҕонон төрөөбүт. Аҕата Иванов Иннокентий Дмитриевич холкуоска бостуугунан үлэлээбит. Ийэтэ Иванова (Бугаева) Варвара Прокопьевна сүөһү үлэтигэр үлэлээбит. Дүлүҥ Күрүө диэн сиргэ ыал буолан олорбуттар. Биэс оҕоломмуттар: Дмитрий, Анна, Афанасий, Николай, Татьяна.
Афоня 1942 сыллаахха Арбын 4 кылаастаах начальнай оскуолатын бүтэрбит. 1945 сыллаахха бэс ыйын 4 күнүгэр Япония сэриитигэр ыҥырыллан барбыт. Байыаннай билиэтигэр суруллубутунан, 21 запасной артиллерийскай полкаҕа стрелогунан 1945 сыл бэс ыйыттан атырдьах ыйыгар диэри сылдьыбыт. Оттон 1945 сыл атырдьах ыйыттан 1948 сыл муус устар ыйыгар диэри 91 ротаҕа стрелогунан сылдьыбыт. 58099 номердаах байыаннай чааска 1948 сыл муус устар ыйыттан 1951 сыл ыам ыйыгар диэри сылдьыбыт. СССР Верховнай Сэбиэтин укааһынан ыам ыйын 8 күнүгэр 1951 сыллаахха демобилизацияламмыт.
Иванов Афанасий Иннокентьевич 1945 сыллаахха «Японияны кыайыы иһин», 1948 сыллаахха «Сэбиэскэй Армия уонна Флот 30 сыла» мэтээллэринэн наҕараадаламмыт.
Дойдутугар кэлэн холкуоска үлэлээбит. 1959 сыллаахха олохтон туораабыт.
Клара Николаевна Иванова,
Афанасий Иннокентьевич быраатын Николай Иннокентьевич кыыһа
Нам, 2016 сыл
.