РУБРИКАТОР
Убайым уоттаах сэриигэ сылдьыбыта
Аҕам убайа Иннокентий Васильевич Иванов Кэбээйи Сииттэтигэр олохсуйан ыал буолан, биэс оҕону төрөппүтэ. Кэргэнэ өлөн, оҕолор тулаайах хаалбыттара. Саамай кыра оҕолорун Проняны аҕалаах ийэбэр ииттэрэ биэрбиттэрин, оҕо оҥостон иитэн-көрөн улаатыннарбыттар.
Проня сүүрбэ сааһьҥар 1942 сыллаахха атырдьах ыйын 14 күнүгэр Аҕа дойдуну көмүскүүр сэриигэ Сэбиэскэй Армия кэккэтигэр ыҥырыллан барбыта. Онтон Улан-Удэҕэ байыаннай үөрэххэ үөрэнэн баран, 1943 сыл балаҕан ыйын 1 күнүгэр Арҕааҥны фроҥҥа барбыта. Сталинградтааҕы гвардейскай мотострелковай дивизиятын автоматнай ротатыгар сэриилэһэ сылдьан улаханнык бааһырбыта. Алта ый госпитальга сытан эмтэнэн баран, 1944 сыллаахха дойдутугар кэлбитэ.
Убайым Прокопий Иннокентьевич Иванов сэриигэ хорсун, бойобуой сырыыларын иһин Албан Аат 3-с степеннээх орденынан, «Германияны кыайыы иһин», «1941-1945 сс. үлэҕэ килбиэнин иһин» мэтээллэринэн наҕараадаламмыта.
Сэрии кэнниттэн Уус Алдантан Арбыҥҥа сүөһү көрө кэлбит кыыһы Куличкина Анна Петровнаны кэргэн ылан, алта оҕону төрөппүтэ. Билигин оҕолоруттан уон сиэн, 14 хос сиэн эһэлэрин аатын ааттаталлар.
Убайбыт Прокопий Иннокентьевич сэрииттэн кэлээт да биригээдэ араас үлэтигэр үлэлээбитэ. Кэлин ыалдар буолан почтаҕа почтальоннаабыта. 1979 сыллаахха ыарахан ыарыыттан күн сириттэн барбыта. Убайбыт сырдык мөссүөнүн куруук өйдүү-саныы сылдьыахпыт. Кини аатын кэнчээри ыччата ааттатар.
Василий Васильевич Иванов, быраата
2015 сыл