РУБРИКАТОР
ТАНКИСТ МИИТЭРЭЙ
Дмитрий Прокопьевич Иванов I Хомустаах нэһилиэгэр Кыһыл Сыырга 1925 сыллаахха төрөөбүтэ, ийэтэ кинини төрөтөөт өлбүтэ, аҕатынаан иккиэйэҕин олорбуттара. Аҕата булдунан дьарыктанара.
1943 сыллаахха I Хомустаах оскуолатын сэттис кылааһын бүтэрбитэ, Кыһыл Армия кэккэтигэр ыҥырыллыбыта. Дима оскуолаҕа үөрэнэр сылларыгар хайыһар спордунан умсугуйан дьарыктанара. Даурияҕа 210-с стрелковай дивизия 582-с стрелковай полкатыгар сулууспалаабыта.
1944 сылга I Белорусскай фронт 6-с армиятын 5-с танковай дивизиятын 22-с полкатыгар танкист-механик этэ. Чаас от ыйыгар Минскэй куораты босхолооһун кыргыһыытыгар кыттыбыта. Дмитрий ыараханнык баас ылан госпитальга киирбитэ.
Үтүөрбүтүн кэннэ Челябинскай куоракка танковай заводка ыыппыттара, заправщик-рабочай быһыытынан үлэлээбитэ. Доруобуйата үчүгэй буоларын кытта 1945 сыл муус устарыгар Дальнай Востокка айаннаабыта.
Забайкальскай байыаннай уокурукка эмиэ 22-с танковай полкаҕа танкист-механигынан сылдьыбыта. Полка атырдьах ыйыгар Японияны утары сэриигэ киирсибитэ. Японецтар аатырбыт-сураҕырбыт Квантунскай армиялара улаханнык бөҕөргөтүммүт оройуоннардааҕа, хайалардааҕа. Олору штурмалаан ылыыга, Хинган сис хайатын туорааһыҥҥа кыырыктаах кыргыһыы уот төлөнүн ортотунан бастакынан танкистар атаакаҕа киирбиттэрэ. Өстөөх харса суох уоту аспыта. Биһигиттэн хас да танк алдьаммыта, умайбыта, онон бастакы атаака табыллыбатаҕа. Хайаны дабайар суол үгүс элбэх мэһэйдэрдээҕэ, танковай полк төттөрү чугуйбута. Иккис атаака авиация күүстээх бомбалааһынынан уонна артиллерия уот силлиэтинэн доҕуһуолламмыта. Биһиги сэриилэрбит Хинган хайаларын аатырбыт бөҕөргөтүнүүлэрин тоҕу силэйбиттэрэ. Дмитрий иккиһин чэпчэкитик баас ылбыта. Танкатын өстөөхтөр алдьаппыттара, ол да буоллар табаарыстарын көмөлөрүнэн экипаж тыыннаах хаалбыта.
Албан ааттаах советскай сэриилэр Маньчжурияны өстөөхтөн ыраастаан, Порт Артурга тиийэн тохтообуттара.
1947 сылга буспут-хаппыт бойобуой танкист Дмитрий Иванов Чига уобалаһыгар III танковай дивизияҕа 165-с ыарахаҥтанковай полкаҕа танка командирынан 1950 сылга диэри сулууспалаабыта.
Бэс ыйыгар төрөөбүт дойдутугар эргиллэн кэлээт, биир да күн өрөөбөккө, тапталлаах Ийэ дойдута сайдарын, тупсарын туһугар үлэлээбитинэн барбыта. Бастаан Нам лесхоһугар леснигинэн үлэлээбитэ. 1955 сылга трактористар курстарын бүтэрэн икки сыл трактористаабыта. Аны 1957 сыллаахха шофердар курстарын бүтэрэн 1975 сылга диэри массыына уруулугар олорбута. Биэс сыл эт-үүт комбинатыгар шофердуур.
1979 сылтан оройуон эргиэнин систематыгар үлэлиир. Дьиссипилиинэтинэн, үлэтинэн, быһыытынан майгытынан үтүө холобуру көрдөрөр. Ытык кырдьаҕаһы дьон-сэргэ дьириҥник убаастыыр. Сэмэй үлэтэ сыаналаах бэлэхтэринэн, бочуотунай грамоталарынан бэлиэтэммитэ, коммунистическай үлэ ударнига.
Саха норуотун биир ньургун уола, урукку танкист Д.П. Иванов коммунистическай партия уонна советскай правительство эйэни таптыыр ленинскэй политикатын истиҥник биһириир. Аны хаһан да сэрии буолбатыгар ис сүрэҕиттэн баҕарар.
Е. Иванов