РУБРИКАТОР
ГОГОЛЕВ МИХАИЛ ИННОКЕНТЬЕВИЧ
Хос эһэм Гоголев Михаил Иннокентьевич - Япония сэриитин кыттыылааҕа. Кини 1926 сыллаахха Нам оройуонун Харыйалаах бөһүөлэгэр күн сирин көрбүтэ.
Кыра эрдэҕиттэн үлэҕэ-хамнаска эриллэн улааппыта. Эдэр, эрчимнээх буолан, туох да үлэттэн толлубакка үлэ киэнэ ыараханыгар сылдьыбыта. Сэрии иннигэр кыһынын от-мас тиэйиитигэр, сайынын бурдук ыһыытыгар, от үлэтигэр күүһүн харыстаабакка үлэлээбитэ.
Уоттаах сэрии саҕаланан, улахан аймалҕан буолбута. Күөгэйэр күннэригэр сылдьар эдэр дьон сэриигэ ыҥырыллыбыттара. Алаһа дьиэлэриттэн, дьонноруттан-сэргэлэриттэн арахсан, саа-саадах тутан өстөөҕү үлтүрүтэ аттаммыттара.
Эһэм армияҕа 1943 сыллаахха, баара суоҕа 16 эрэ сааһыгар, сааһын эбэн туран, тылланан барар. Онно тиийэн 17-с советско-монгольскай мотострелковай полкаҕа ефрейторынан сулууспалыыр. Онтон Япония сэриинэн саба түһээтин кытта, Япония сэриитигэр барар. Онно гвардейскай полкаҕа сылдьан дьоппуон милитаристарын кытта хорсуннук сэриилэспитэ. 1946 сыл күһүнүгэр кыайыы-хотуу көтөллөнөн төрөөбүт түөлбэтигэр эргиллэн кэлэр.
Эһэм олох саҥата суох, кыра, хатыҥыр киһи эбитэ үһү. Ол да буоллар бииргэ сэриигэ сылдьыбыт табаарыһа Николай Атласов кэпсииринэн, сүрдээх сымса, күүстээх, туохтан да толлубат саллаатынан биллибит.
Сэрииттэн кэлэн баран, араас үлэҕэ үтүө суобастаахтык үлэлээбит. Ол курдук сэрии уотун ортотунан ааспыт, бары үлэҕэ сыстаҕас киһини Фрунзе учаастагар биригэдьиир курдук эппиэттээх үлэни сүктэрбиттэр. Оччотооҕу сэрии кэннинээҕи уустук кэмҥэ бу үлэтигэр хас да сыл сүрэҕин баҕатынан үлэлээбит. Эдэр киһи идэ ылар баҕата баһыйан, биригэдьиириттэн уурайан, прораб үөрэҕин үөрэнэн бүтэрэн, баҕалаах үлэтигэр тутууга таһаарыылаахтык үлэлээбит. Аны ким да сөбүлэспэтэх үлэтигэр маҕаһыыҥҥа атыыһыттаа диэн аҕыйах сыл онно эмиэ үтүө суобастаахтык атыыһыттаабыт. Эһэм ханнык да үлэҕэ ананнар: «Ээ, онно Мэхээлэ үлэлиир дуо, бэрт эбит» - диэн дьон ытыктабылын, хайҕабылын ылан үтүө суобастаахтык үлэлээбит. Онон эһэм фроҥҥа хорсун саллаат, эйэлээх олоҕу тутууга төһүү үлэһит эбит.
1951 с. эбэбин Данилова Жиркова Мария Семеновнаны көрсөн олоххо аналынан ыал буолбуттара. Уон оҕону төрөтөн, ыал тэҥинэн ньир бааччы олорон, үлэни эрэ өрө тутан, бу орто дойдуга олорон ааспыта. Эһэм барахсан 1976 с. сэрии, сут-кураан, ыарахан үлэ-хамнас тэбиититтэн 50 эрэ сааһыгар сэтинньи ыйга олохтон туораабыта.
Эһэм түөһүн «Японияны Кыайыы иһин», «Хорсунун иһин» мэтээллэр, Гвардейскай значок киэргэппиттэрэ.
Ахтыыны суруйда хос сиэнэ Тарабукин Афоня.