РУБРИКАТОР
Феоктистов Николай Иннокентьевич
(1924-1999 сс.)
Наҕараадалара:
Аҕа дойду сэриитин II степеннээх уордьана;
«Японияны кыайыы иһин» мэтээл;
«1941-1945 cc. Аҕа дойду сэриитигэр килбиэннээх үлэтин иһин» мэтээл;
Жуков мэтээлэ;
Юбилейнай мэтээллэр.
Феоктистов Николай Иннокентьевич 1924 с. сэтинньи ый 22 күнүгэр Нам оройуонун Үөдэй нэһилиэгэр төрөөбүтэ. Кини Сэбиэскэй Армия кэккэтигэр 1944 с. бэс ыйын 7 күнүгэр ыҥырыллыбыт уонна байыаннай үөрэҕи барбыт. 1945 с. атырдьах ыйын бүтэһигэр сэриигэ киирбит. Ол туһунан Николай Иннокентьевич маннык ахтар: «Мин Сэбиэскэй Армия кэккэтигэр ыҥырыллан илиҥҥи границаҕа Даурия диэн сиргэ 210-с стрелковай дивизия 648-с стрелковай полкатыгар байыаннай бэлэмнэниини барбытым, Японияны утары сэриигэ кыттыыны ылбытым. Аан бастаан Аргунь өрүһү туораан Маньчжурияҕа, Хайлар куорат туһаайыытынан 122 километр сири сатыы айаннаан баран, Хайлар куоракка 2 суукка устата сэриилэспитим. Кыраныыссаны 1945 с. атырдьах ыйын 8 күнүгэр туораан баран, 1945 с. балаҕан ыйын 3 күнүгэр сэриини түмүктээбиппит. Бу бириэмэ устата Хинган хайаны туораан уонна элбэх нэһилиэнньэлээх пууннары Харбин куоратынан Маньчжурия столицата Чань-Чуньҥа түмүктээбиппит. Манна тиийбиппит кэннэ миигин 12-с туспа стрелковай батальон иһинэн контрразведка «Смерш» диэн спецбатальоҥҥа анаабыттара, штаб округа границаттан тахсыар диэри Маньчжурияҕа олорон бэрээдэги олохтообуппут. Ол кэнниттэн Сэбиэскэй сиргэ 1946 с. ыам ыйыгар Хабаровскайга кэлбиппит».