РУБРИКАТОР
Делиграсов Егор Николаевич
Егор Николаевич Калинин аатынан колхозка биригэдьиирдии сылдьан 1942 сыллаахха от ыйыгар сэриигэ барбыт. Ол иннинэ “Ньопполук” колхозка председателинэн үлэлээбит. Сэриигэ Кременчуг куораты босхолооһуҥҥа кыттыбыт. Бу куораты босхолооһуҥҥа 7 байыаннай чаас “Кременчугскайдар” диэн бочуоттаах ааты ылбыттар (Великая Отечественная война, энциклопедия, С. 380). 1943 сыллаахха Днепр өрүскэ кыргыһыыга Егор Николаевич кыттыыны ылбыта. Днепр өрүс биһиги Бүлүүбүт, Алдаммыт курдук кэтит туорааһыннаах, эбир долгуннаах, уута килэйэн уҥуоргу биэрэгин кумаҕа көҥүрүттэ турар үрдүк. Сарсыарда халлаан сырдыан иннинэ, унуоргу биэрэккэ тахсан, өрүс үрдүк сыырын анныгар чаастар атаакаҕа бэлэмнэммиттэр. Борук-сорук буолуута атаакаҕа туран немецтэр инники кирбиилэрин көҥү охсон, Днепр өрүс уҥа биэрэгэр бастакы чаастар тахсыбыттар. Өрүһү туорааһын түүнү быһа барбыт. Ити кэмҥэ Кременчугунан туораабыт фашистскай сэриилэр өрүс уҥуоргу биэрэгин толорон, дивизия плацдармаларыгар саба түспүттэр. Атырдьах ыйын 25-с түүнүттэн алтынньы ый ортотугар диэри Днепр өрүс ити учаастагар ыар кыргыһыы буолбут. Мин аҕам, Делиграсов Егор Николаевич, уоттаах сэрии ортотугар сылдьан геройдуу өлбүт. Кини Полтавскай уобаласка Кременчугскай оройуон Успенское дэриэбинэтигэр көмүллүбүт.
М.Е.Делиграсова