РУБРИКАТОР
Сэрии суолларынан уһун сылларга
Иннокентий Иванович Данилов 1921 с. I Хомустаах нэһилиэгэр элбэх оҕолоох Даниловтар дьиэ кэргэттэригэр төрөөбүтэ Төрөппүттэрэ: аҕата Данилов Иван Иванович, ийэтэ Коврова Дария Семеновна Горнай улууһун I Атамай нэһилиэгиттэн төрүттээхтэр. 16 оҕоттон Иннокентий Иванович быраатынаан Василий Ивановичтыын ордон хаалан I Хомустаах нэһилиэгэр өp уһуннук олорон, үлэлээн Даниловтар аймахтары тэниппиттэрэ. Иннокентий Иванович Партизан оскуолатыгар 4 кылааһы бүтэрбитэ. Оччотооҕу оҕо колхоз араас үлэтигэр улахан дьону кытта тэҥҥэ эриллэн, буһан-хатан барбыта. 1936-38 сс. “Кыһыл салаа” колхозка биригэдьиир солбуйааччытынан үлэлээбитэ. 1938-39 сс. трактористар курстарын бүтэрэн нэһилиэккэ кэлбит 1-кы “Фордзон” тракторы баһылыыр. 1939 с. 18 сааһыгар хонуу биригэдьииринэн ананар. 1941 с. Дьокуускай куоракка тыа хаһаайыстыбатын механизациялааһын курсугар үөрэнэ сырыттаҕына Аҕа дойду сэриитэ саҕаланар. Курсу бүтэрэн тахсан, механик-комбайнер буолан МТС-ка үлэлиир. Ол кэмҥэ техниканы баһылыыр-көһүлүүр специалист (суох буолан) тиийбэтинэн 1 сыл устата бронь биэрэллэр. 1942 с. балаҕан ыйыгар Советскай Армия кэккэтигэр ыҥырыллар. Читаҕа десантнай чааска үөрэнэн парашютист-связист специальноһын ылар. Ол сыл алтынньы ыйга сэриигэ Соҕурууҥҥу фроҥҥа тиийэр. Кривой Poг станциятын буомбалааһыҥҥа түбэһэн, атаҕар ыараханнык бааһыран госпитальга түөрт ый эмтэнэр. Ол кэнниттэн Ростов куоракка Дону туоруур муоста оҥоруутугар, тимир суолга сулууспалыыр армияҕа, салгыы 18-с тимир суол тутуутун батальонугар үрдүк дьиссипилиинэлээхтик, бэйэтин харыстаммакка, чиэһинэйдик сулууспалыыр. Сэрии бүппүтүн кэннэ 1945-1948 сс. муус устар 18 күнүгэр диэри Брянскай куоракка дойдуну сэрии урусхалыттан чөлүгэр түһэриигэ бэриниилээхтик үлэлиир. Ити кэмҥэ 1947 с. Брянскай куоракка сулууспалыы сылдьан коммунистическай партия чилиэнэ буолар. 1948 с. сэрииттэн эргиллэн кэлиэҕиттэн төрөөбүт нэһилиэгэр Жданов аатынан колхоз, салгыы “Нам” совхоз төһүү үлэһитэ: маҥнайгы тракториһа, суоппара, колхоз чулуу комбайнера, механига Иннокентий Ивановичтан үөрэнэн “Нам” совхоз элбэх бастыҥ механизатордарга үүнэн, уһуйуллан тахсыбыттара. Кини пенсияҕа тахсыар диэри “Нам” совхоз социальнай-экономическай сайдыытыгар дьоһуннаах кылааты киллэрбитэ. Пенсияҕа тахсан да баран, ыччат наставнигын быһыытынан үтүө суобастаахтык үлэлээбитэ. Иннокентий Иванович Аҕа дойдуну көмүскүүр сэрии орденын кавалера, сэрии сылларыгар “Хорсунун иһин” мэтээлинэн бэлиэтэммитэ. Сэрии кыттыылааҕын быһыытынан элбэх юбилейнай мэтээллэрдээх. Советскай Союз Верховнай командующайыттан, суол-иис министриттэн, Саха АССР Верховнай Советын Президиумуттан, Нам оройуоннааҕы советыттан, райкомуттан элбэх грамоталардаах, махтал суруктардаах. Иннокентий Иванович элбэх оҕолоох улахан, эйэлээх дьиэ кэргэн амарах аҕата, эһэтэ этэ. 12 оҕону иитэн, үөрэттэрэн, атахтарыгар тypyopaн олоххо суолларын-иистэрин буллулар. Сэмэй, көнө, судургу майгылаах, аһыныгас амарах санаалаах аҕа, эһэ, улуус маҥнайгы чулуу механизатора, сэрии ветерана 2004 с. 82 сааһыгар олохтон туораабыта.
Л.В.Алексеева, С.Р.Данилов