РУБРИКАТОР
Свинобоев Игнатий Игнатьевич I
(1905-1942 cc.)
Биһиги төрөппүт аҕабыт Свинобоев Игнатий Игнатьевич I 1942 сыл бэс ыйын 24 күнүгэр фроҥҥа ыҥырыллыбыт, оччолорго кини 37 саастаах эбит. Сэриигэ барарыгар биһиги үс оҕо хаалбыппыт. «Оҕолорум, бары үөрэхтээх дьон буолаарыҥ, дойдугутугар туһалаах үлэһит дьон буола улаатыҥ», — диэн эппитэ.
Аҕабыт 1905 сыллаахха Үөдэйгэ төрөөбүт. Онно улааппыт, үлэлээбит. Дьокуускайдааҕы педтехникуму бүтэрэн учуутал идэтин ылбыт. Кини 16 сыл устата, сэриигэ ыҥырыллыар диэри, Үөдэй оскуолатыгар учууталынан, сэбиэдиссэйинэн таһаарыылаахтык үлэлээбитэ. Улуустааҕы архыып матырыйааллара уонна оччотооҕуга киниэхэ үөрэнэ сылдьыбыт дьон кэпсииллэринэн, аҕабыт сүрдээх сымнаҕас, оҕолорго олус өйдөнүмтүө тыллаах-өстөөх учуутал үһү. Үөдэй нэһилиэгин ыччаттара үөрэхтээх дьон буолалларыгар олус кыһаллара диэн ахталлар. Кини туттарбыт оскуолатыгар сэриигэ ыҥырыллыар диэри сэбиэдиссэйинэн үлэлээбитэ.
Игнатий Игнатьевич Челябинскэй куорат таһыгар младшай командирдары үөрэтэр курска үөрэнээт, сэриигэ аттаммыт. Ржев куораты ылар хабыр хапсыһыыга кини хамаандалыыр отделениета инники күөҥҥэ сылдьан, өстөөх буулдьатыттан табыллан өлөрдүү охтор. Ити туһунан биһиги аҕабытын кытта биир чааска сулууспалаабыт Аппааны киһитэ Семенов ахтыыта баар.
Аҕабыт Игнатий Игнатьевич 1942 с. балаҕан ыйыгар Ржев куораты ылыыга өстөөх буулдьатыттан охтубут, көмүллүбүт сирэ биллибэт.
Н. Назарова, А. Лукина,
кыргыттара