РУБРИКАТОР
Свинобоев Игнатий Игнатьевич II
(1925-1981 сс.)
Наҕараадалара:
«1941-1945 сс. Аҕа дойду сэриитигэр Германияны кыайыы иһин» мэтээл;
«Японияны кыайыы иһин» мэтээл;
Юбилейнай мэтээллэр.
Свинобоев Игнатий Игнатьевич II Сэбиэскэй Армияҕа 1943 с. бэс ыйыгар Дьокуускайдааҕы педучилищеҕа үөрэнэ сылдьан ыҥырыллыбыта. Кини ити кэмҥэ 18 эрэ саастааҕа. Бастаан Забайкальскай фронт 582-с стрелковай полкатыгар сулууспалаабыта. Хайлар куораты босхолооһуҥҥа уонна Чингар хайатыгар сэриилэспитэ. Оттон младшай командирдар үөрэхтэрин бүтэрэн 1947-с диэри 35645-с воинскай чааска отделение командирынан, Забайкальеҕа араас чаастарга сулууспалаабыта.
Дойдутугар 1949 с. кулун тутар ыйга эргиллибитэ. Кинилиин бииргэ сулууспалаабыт Лебедев Конон ахтар: «Игнатий үөрэхтээх буолан, нууччалыы олус үчүгэйдик билэрэ, биһиги, сахалар, көмүскэлбит этэ. Бары дьыалабытын кини нөҥүө быһаарсарбыт. Игнатий алта ыйдаах сержантскай курсу бүтэрэн баран биһиэхэ командирынан анаммыта. Биһиги бөҕөргөтүүлээх танковай хаспахтары траншеялары хаһарбыт. Онтон арҕааттан эбии байыаннай чаастар кэлбиттэрэ.
Атырдьах ыйын саҥатыгар Аргунь өрүһү туорааммыт, Хайлар куораты штурмалааһыҥҥа хабыр киирсии буолбута. Биһиги дивизиябыт куораты босхолообута. Атырдьах ыйын 10-11 күннэригэр Чинган хайатыгар дьоппуоннар сүрүн күүстэрин түмэллэрэ, харса суох сэриилэспиттэрэ. Икки өттүттэн улахан сүтүк тахсыбыта. Биһиги киэһэ 644-с полканы солбуйа киирбиппит, суопкалары үлтү буомбалаабыппыт. Кэлин ааһан иһэн көрдөхпүтүнэ, суол икки өттө бүтүннүүтэ дьоппуоннар өлүктэрэ этэ. Сарсыарда күн тахсыыта икки маҥан былаахтаах дьоппуон саллааттара кэлэннэр, биирдэрэ офицер этэ, «бэринэбит» диэн биллэрбиттэрэ, тиистэригэр гранатаны ытыра сылдьаллара.
Игнатий биһиэхэ замполит-комсорг этэ, политзанятиелары ыытара. Командирдар сүрдээҕин ытыктыыллара, парад кэмигэр трибунаҕа улахан командирдары кытта бииргэ турара, тыл этэрэ».
Игнатий Игнатьевич II сэрииттэн кэлээт, дойдутугар Үөдэйгэ кэргэннэнэн 4 оҕолонон, юрист идэтин ылан, араас үлэлэлэргэ таһаарыылаахтык үлэлээбитэ.