РУБРИКАТОР
ИНБЭЛИИТ БУОЛАН ТӨННҮБҮТЭ
Биһиги дьоллоох олохпут иһин тыыннарын толук уурбут, сэрии толоонуттан тыыннаах ордон, кыайыыны ситиһэн кэлбит дьоннортон биирдэстэринэн Партизан олохтооҕо, педагогическай үлэ ветерана Семен Никонович Стручков буолар.
Кини 1942 сыллаахха бэс ыйыгар армияҕа ыҥырыллыбыта. Бершет станцияҕа тиийэн, оһуобай хайыһар биригээдэтигэр талыллан сулууспалаабыта. Ити кэмҥэ сэриигэ киирэн нэһилиэнньэлээх пууннары босхолооһуҥҥа активнай кыттыыны ылбыта.
Нөҥүө сылыгар артиллерист үерэҕин бүтэрэн кыргыһыыга кыттыбыта. Немецтэр кимэн киириилэрэ күүһүрбүтэ. Сир-халлаан ньиргийэрэ, күн көстүбэт, тыынар тыыннаах ордубат, суостаах-суодаллаах сэриитэ буолбута. Балаҕан ыйын 9 күнүгэр Духовщина диэн куораты босхолуур кыргыһыыга кыттыыны ылбыта. Бу кыргыһыыга Семен Никонович иккитэ ыараханнык бааһырбыта. Онон уһуннук госпиталларга сытан эмтэммитэ, иккис группалаах инбэлиит буолбута. Кини кыргыһыыга көрдөрбүт хорсун быһыытын иһин «За отвагу» медалынан наҕараадаламмыта.
e=Аҕа дойдуну көмүскүүр Улуу сэрии бүтүүтүгэр иккис группалаах сэрии инбэлиитэ буолан дойдутугар төннүбүтэ. Кини түөһүн Аҕа дойду сэриитин I степеннээх ордена, «1941-45 сс. Германияны Кыайыы иһин» о.д.а. медаллар киэргэтэллэр. Дойдутугар эргиллээт, Майа оскуолатыгар учууталынан үлэлээбитэ.
1945-46 сс. үөрэх сылыгар Бүтэйдээх сэттэ кылаастаах оскуолатыгар военруктаабыта. Нөҥүө сылыгар учительскай институкка үөрэнэ киирбитэ. Учуутал идэтин баһылаабытын туоһулуур диплому ылан баран, республика араас оройуоннарыгар учууталынан, үс сыл директорынан, 11 сыл завуһунан үлэлээбитэ. С.Н. Стручков ыччаты иитиигэ-үөрэтиигэ үчүгэй үлэтин иһин ССРС медалларынан, бочуотунай грамоталарынан наҕараадаламмыта. 1967 сыллаахха пенсияҕа тахсан баран 1983 сылга диэри идэтинэн учууталлаабыта.
Педагогическай үлэ ветерана Партизаҥҥа «Партизанскай албан аат» музейын
аспыта. Саха сиригэр буолбут гражданскай сэриини көрдөрөр музейга
экспонаттары хомуйбута. Нэһилиэк уонна оройуон олоҕун уонна үлэҕэ
ситиһиилэрин кэпсиир баай ис хоһоонноох
тус-туспа отделлардаах. С.Н. Стручков оройуон бочуоттаах гражданина. Аҕа
дойду Улуу сэриитин Кыайыытын 55 сыллаах үөрүүлээх юбилейын сэрии
ветерана С.Н. Стручков 88 сааһын туолан көрүстэ.
В. КОЛЕСОВ