РУБРИКАТОР
КУРСКАЙ ТО5ОЙГО КЫРГЫСПЫТА
Аҕам Сивцев Семен Иннокентьевич 1919 с. балаҕан ыйын 14 күнүгэр Нам улууһун Хатын-Арыы нэһилиэгэр төрөөбүт.
Кини 1942 с. бэс ыйын 22 күнүгэр сэриигэ барарга бэбиэскэ туппут. Уралга Челябиискай куоракка 1942 с. атырдьах ыйын 9 күнүгэр кинилэри 273-с полковой минометнай стрелковай чааска суруйбуттар. III Украинскай фронт састаабыгар киирэн Курскай тоҕой хайысхатынаи айаннаан Прохоровка станцияҕа тиийэн тохтообуттар. Онно сэриигэ киирэргэ бэлэмнээбиттэр. 1943 с. от ыйын 7 күнүгэр дьиҥнээх сэриигэ киллэрбиттэр.
«Тулабыт ньиргийэн олороро, самолет тыаһа, буомба эстиитэ, артиллерия ытыалааһына, киһи дөйүөх, куйахата күүрүөх курдук тыаһа-ууһа, аттыбытыгар табаарыстарбыт араанньа буолбут, ким эрэ өлбүт дьулаан хартыына этэ», - диэн кэпсиирэ эһээбит. Ол сэриилэһэ сылдьан эмискэ атаҕар туох эрэ «ньир» гыммыт да, сууллан түспүт. Биирдэ өйдөнөн көрбүтэ, хаҥас атаҕа бэгэччэгинэн халдьаччы барбыт, санчааска сытар эбит.
Сотору Таджикистаҥҥа Сталинабад диэн куоракка 44-48 №-дээх госпитальга сытан тайахтаах хаамар буолбутун кэннэ, комиссиялаан дойдутугар ыытарга быһаарбыттар. Поеһынан Иркутскайга кэлэн портка сахалары көрсөн, олору кытта аргыстаһан айаннаан, 1943 с. балаҕан ыйыгар дойдутун булбут.
Кэлэн баран өрөөт, сынньанан сытар түгэн суох. Нэһилиэк сэкэрэтээринэн олордон кэбиспиттэр. Сотору буолаат, райсовекка инструкторынан анаабыттар. 1951 с. колхозтар холбоһууларынан сибээстээн, саҥа «Карл Маркс» аатынан колхозка суотчутунан пенсияҕа тахсыар диэри үлэлээбитэ. Семен Иннокентьевич «Германияны кыайыы иһин» уонна юбилейнай мэтээллэрдээх, II группалаах сэрии инбэлиитэ этэ.
Уоттаах сэриигэ геройдуу охсуспут, эйэлээх олоххо чиэһинэйдик үлэлээн олорбут, дьон-сэргэ сүдү ытыктабылын ылбыт аҕам туһунан оҕолорбор-сиэннэрбэр, бар дьоммор кэпсээн үйэтитэр ытык иэстээхпин.
Кыыһа Светлана Бетюнская