РУБРИКАТОР
БУРНАШЕВ НИКОЛАЙ АНДРЕЕВИЧ
(1904-1964)
Бурнашев Николай Андреевич -1904 сыллаахха Көбөкөҥҥө төрөөбүтэ. Сэрии иннинэ «Лена» холкуоска үлэлээбитэ. Холкуос араас түбүктээх үлэтин толорууга сылдьыбыта - ол курдук оттооһуҥҥа, сүөһү көрүүтүгэр, мастааһыҥҥа, оту тиэйиигэ. Кэргэннэнэн, оҕолонон дьоллоохтук олорон истэҕинэ, 38 сааһын туолбутун кэннэ 1942 сыл бэс ыйыгар сэриигэ ыҥырыллыбыта. Кыра уола баара суоҕа үс саастааҕар сэриилэһэ барбыта. Начальнай кылаас үөрэхтээх этэ, ол гынан баран барыны-бары быһаарсар сытыы киһи этэ. Кини Ржевско-Вяземскай фронт састаабыгар киирэн сэриилэспитэ, Ржев куорат иһин кыргыһыыга улаханнык бааһырбыта. Хорсуннук сэриилэспитин иһин Николай Андреевич «За отвагу» мэтээлинэн бэлиэтэммитэ. Онон инвалид буолан «комиссияланан» дьиэтигэр төннүбүтэ. Ол кэлэн баран инвалидпын диэн олорботоҕо, үлэ үөһүгэр түспүтэ. Төбөтүгэр ылбыт улахан эчэйиитэ суола-ииһэ суох хаалбатаҕа. Ыалдьан 60 сааһыгар, 1964 сыллаахха өлбүтэ. Билигин Николай Андреевич биэс сиэннэриттэн Бурнашев Николай Николаевич Көбөкөҥҥө олорор, улахан дьиэ кэргэн аҕа баһылыга. Эһэтин аатын сүгэр улахан сиэнэ Бурнашев Андрей Николаевич уһун дистанцияҕа сүүрүүгэ республика биллэр спортсмена. Улахан сиэнэ кыыс Лисачева Анна Николаевна интернат үлэһитэ, элбэх оҕолоох дьиэ кэргэн далбар хотуна.
Ити курдук, хорсун буойун саллаат Николай Андреевич Бурнашев олорбут олоҕо оҕолорунан, сиэннэринэн салҕанар. Үтүө киһи оҥорбут хорсун быһыыта тыыннааҕар сыаналамматаҕа хомолтолоох. Ол гынан баран кини аатын сиэннэрэ, хос сиэннэрэ киэн тутта ааттыахтара диэн эрэл баар.
Ахтыыны суруйда сиэнэ Бурнашев Николай Николаевич