РУБРИКАТОР
Япония сэриитигэр кыттыыны ылбытым
Мин 1924 сыллаахха Арбын нэһилиэгэр дьадаҥы кэргэҥҥэ төрөөбүтүм. 1936 с. Арбын түөрт кылаастаах оскуолатын үөрэнэн бүтэрбитим. Онтон 1941 с. Сиэгэн Күөл сэттэ кылаастаах оскуолатын бүтэрбитим.
1942 с. атырдьах ыйыгар Аҕа дойду Улуу сэриитигэр армияҕа ыҥырыллан барбытым. 1942 сылтан 1947 сылга диэри Забайкальскай байыаннай округ 226 стрелковай дивизиятыгар отдельнай артиллерийскай полкаҕа сулууспалаабытым. Арҕаа ынырык кыргыһьгы бириэмэтигэр илиҥҥи фроҥҥа эмиэ улахан куттал баар этэ. Ол милитарийскай Япония биһиэхэ иккис фрону аһыахтааҕа. Онон сибээстээн илин улахан күүс туруоруллубута. Онно биһиги Монголия иһигэр киирэн, улахан бэлэмнэнии үлэтэ буолбута. Окопа, траншея, блиндаж, кэтээн көрөр тутуулары ыытарбыт. Кыһынын наар үөрэх ыытыллара. 1945 сыллаахха Верховнай командования бирикээһинэн Япония утары сэриигэ барбыппыт. Биһиги Армиябыт Монголиянан киирэн Китай сиринэн улахан Кингант хайатын чиэрэстээн киирбитэ. Онно ханнык да сэрии утарсыбатаҕа. Онон-манан кыра байыаннай чаастар турбуттара эрдэ күрэнэн испиттэрэ, кураанах казармалары көрүтэлиирбит.
1947 сыллаахха бэс ыйыгар демобилизацияланан дойдубар эргиллэн кэлбитим.1947 сылтан 1950 сылга диэри холкуоспар кэлэн хонуу биригэдьииринэн, 1950 сылтан 1959 сылга диэри Арбын Ворошилов аатынан холкуоска холкуос бырабылыанньатын бэрэссэдээтэлинэн быыбарданан үлэлээбитим.
1960-1961 сылга холкуостар холбоспуттара. Онно «Коммунизм» холкуос Арбыннааҕы биригээдэтигэр биригэдьииринэн, 1961-1971 сылга диэри Арбын маҕаһыыныгар сэбиэдиссэйинэн, 1971-1973 сылга диэри Нам оройуонун мясомолпромугар арыы заводугар уонна Көбөкөннөөҕү сүөһү тутар пууҥҥа үлэлээбитим. 1973-1981 сылга диэри Нам оройуонун лесхоһугар леснигынан үлэлээбитим. Билигин пенсияҕа тахсан олоробун.
Василий Никифирович Бугаев
1981 сыл сэтиннъи 18 күнэ
.