Бугаев Василий  Иннокентьевич

 

Биһиги эһэбит Бугаев Иннокентий Семенович 1886 сыллаахха төрөөбүт киһи эбит. Ийэлэриттэн Александра Михайловнаттан 36 сыл аҕа курдук өйдүүллэр. Кини бастакы кэргэниттэн уола Бугаев Василий Иннокентьевич 1922 эбэтэр 1924 сыллаахха төрөөбүт диэн биллэр.

Иннокентий Семенович тыыннааҕар уолун Василий туһунан аҕыйах тылынан кэпсээбитэ.

Василий 18 саастааҕар армияҕа ыҥырыллан сэриигэ барбыт. Москва анныгар сулууспалаабыт. Кини өстөөхтөрү кытта кыргыһыыга 2-с пулеметчигынан сылдьыбыт. Маҥнайгы пулеметчик өлбүтүн кэннэ, кини солбуйан өстөөххө уоту харса суох аспыт. Күн аҥаара кыргыһыыга кини өстөөхтөрү кыргыбыт. Ол кыргыһыыга Василий сэҥийэтин үлтү ыттаран улаханнык бааһырбыт. Кинини госпитальга сытыаран эмтии сатаабыттар да, улахан бааһы ылан кыайан өрүттүбэтэх. Госпитальга сытан өлбүт. Эдэркээн Василий похоронатыгар Москва куорат олохтоохторо, байыастар уонна офицердар — барыта 1300 киһи мустан көмпүттэрин туһунан өлбүт биллэриитигэр суруллубутун ааҕан биэрбиттэрин, аҕата Бугаев Иннокентий Семенович кэпсээбититтэн суруллубут ахтыыны сурукка тистибит. Сэриигэ баран биир сыл буолаат өлбүт. Оччотооҕуга итинник биллэриилэр төрөппүттэргэ, сэриигэ сылдьар дьон кэргэттэригэр чаастатык кэлэллэрэ...

2015   лаахха военкомат архыыбыттан ылыллыбыт дааннайдар:

 - Бугаев Василий Иннокентьевич, 1922 г.р., уроженец Арбынского наслега Намского района, призван в 1942 г. ЯОРВК, погиб в 1943 г., место захоронения не установлено. Основание: Книги «Память», том 3, стр.51., п.п 493.

- Бугаев Василий Иннокентъевич, 1942 г.р. (так записано в документе), красноармеец, погиб 25.05.1944 г., место захоронения г. Москва, ул. Орджоникидзе, 4, московского крематория. Основание: информация из списков захоронения ЦА МО РФ №271054818 - диэн сурулла сылдьар эбит.

Хайата сөптөөҕүн хантан чуолкайдаан билиэххэ сөп эбитэ буолла?

Хантан да итинтэн атын сурук, өлбүтүн туһунан биллэриигэ, саатар, биир устуука хаартыската хаалбатах.

Бу архыып дааннайдарын аҕатынан бииргэ төрөөбүт быраата Бу-гаев Иннокентий Иннокентьевич ирдэһэн булан биэрдэ. 06.02.2015 с. аҕата, биһиги эһэбит Бугаев Иннокентий Семенович уола өлбтүн кэннэ биһиги эбэбитин кэргэн ылбыта дуу, уола баарыгар ылбыта дуу, билигин үчүгэйдик билэр киһи суоҕунан чуолкайа биллибэт. Эбэбит Александра Михайловна 1922 с. төрөөбүтэ. Эһэбит эбэбитин кытта сэрии сылларыгар үлэ фронугар Томмокко суол оҥоруутугар үлэлээбиттэр үһү. Онно 3 сыл үлэлээбиттэрэ. Эбэбит Томмокко үлэлээбитигэр хамнас суотугар кыптыый, иннэ бөҕөтүн ылан дьүөгэлэригэр кэһиилэнэн үөрэн-көтөн кэлээри сылдьан ол түүн уордаран ылан наһаа хомойбутун өргө диэри кэпсиирэ.

Кэлэн да баран оччотооҕу кэм сиэринэн тыылга олоҕу, Кыайыыны уһансыбыт дьонунан буолаллар. Холкуос, сопхуос үлэтигэр эриллибиттэр. Сүрдээх кыайыылаах-хотуулаах үлэһит дьон этилэр диэн кэпсииллэр этэ. Эһэбит, норуокка ааттанарынан Куута Оҕонньор, мас, тимир ууһа эбит. Үһү-таамах кэпсээнинэн, тимир бэстилиэт оҥостон икки тайаҕы өлөрөн дьону абыраабытын сорох дьон өйдүүллэр. Сааһыран баран хаһаайыстыбаланан бэйэтигэр от охсо сылдьан салгыҥҥа оҕустаран ыалдьан кэлэн, 3 сыл буолан баран 1973 сыллаахха өлбүтэ. Биһиги оҕо сырыттахпытына, оччотооҕу дьон бары да сэмэйдэрэ бэрт буолан дуу, аахайан кэпсээбэтэхтэр. Биһиги орой мэник оҕолор олох да кыһаммат этибит. Хата эһэбит ыалдьан сыттаҕына атаҕын кычыкалатарбытын өйдүүбүн. Похоронатыгар миигин аҕабыт тракторынан детсадтан аҕалбыта. Дьиэбэр киирээт дьиэбитин наһаа үчүгэйдик сибэккинэн киэргэппиттэр дии санаабытым өйбөр хаалбыт. Аны санаатахха, харыйа лабаатыттан венок оҥорбуттарын санаабыт эбиппин... Эһэҕит барда, аны хаһан да кэлбэт диэбитэ эбэбит. Кини көмүс уҥуоҕа Үүттээххэ хараллан сытар. Билигин сааһыран түспэтийэн, хайдахтаах курдук ыарахан олоххо олорон ааспыттарын дьэ өйдөөн, ахтан суруйаары гыннахпытына, тугу да билбэт эбиппит.

Бу эһэбит уолун Бугаев Василий Иннокентьевич туһунан ийэбит Людмила Иннокетьевна онон-манан ахтан, сэриигэ баран өлбүт убайбыт эрэ диэн кэпсиир этэ. Саатар, хаартыската ханна да баара биллибэт. Ол саҕана кэлэн түһэрэллэрэ да ахсааннаах буолуо. Сорох кинитээҕэр саастаах дьон хаартыскалара бааллар да, Василий Иннокентьевич хаартыската ханна да суох...

Биһиги эһэбит Иннокентий Семенович эбэбитин Александра Михайловнаны кытта 6 оҕоломмуттара. Улаханнара биһиги ийэбит Герой Ийэ Бугаева Людмила Иннокентьевна буолар. Кини аҕабытын Дмитрий Романович 2 кытта 10 оҕолоохтор. Оҕолоро бары ыал буолан оҕолонон-урууланан, сорохтор номнуо сиэннэнэн эрэллэр. Улахан уоллара Михаил Иннокентьевич Ирина Васильевналыын үс оҕолоохтор. Михаил эдэр сааһыгар оһолго өлбүтэ. Иккис уол Василий Иннокентьевич кэргэнинээн Лидиялыын 2 уол оҕолоохтор, сиэннэрдээхтэр. Василий тустууга спорт маастара. Сааһын тухары Москва куоракка олорбута. Үһүс уол, аҕатын аатын ылбыт Иннокентий Иннокентьевич, биир уоллаах. Төрдүс уол Валентин Иннокентьевич кэргэнинээн Галина Семеновналыын 5 оҕолоохтор, сиэннэрдээхтэр. Кыра уол Семен Иннокентевич икки уоллаах, сиэннэрдээх.

 

И.С. Бугаев оҕолорун, С.Д. Иванова сиэннэрин аатыттан

09.02.2015 с.