РУБРИКАТОР
ЭЙЭ ЭРЭ БААР БУОЛЛУН!
Кыайыы 50 сыла туола-рынан сибээстээн мин Бугаев Тимофей Ивановиһы кытта кэпсэттим.
— Мин Кириэстээххэ 1923 сыллаахха төрөөбүтүм. Аҕам үстээхпэр, ийэм 12 саастаахпар өлбүттэрэ. Ийэм өлөрүгэр 4 кылааска үөрэммитим. Ол кыһын аанньа үөрэммэтэҕим, ол эрээри нөҥүө кылааска таһаарбыттара. Күһүнүгэр дьонум (таайым Микииппэрдээх) үөрэххэ ыыппатахтара, колхозка үлэлээн аһаатын диэбиттэрэ. Оччотооҕу сэбиэттэр уолу Хатырыкка үөрэттэрэ ыытыҥ диэбиттэрин аккаастаабыттара. Ол түмүгэр үөрэхтэн маппытым.
1943 сыл бэс ыйыгар 20 саастаахпар армияҕа барбытым. Онно Забайкальскай байыаннай уокурук, Бурят-монголиятааҕы Горгон тимир суол станциятыгар ыскылаакка үлэлээбитим. Онно арҕаа барар араас таһаҕаһы, пиломатериалы вагоннарга тиэйэрбит. Үстүү суукка усталаах туоратыгар утуйбакка үлэлиирбит. Бүтэй вагоннарга сэрии сэбин тиэйэрбит. Араас эстэр (дэлби тэбэр) веществолары кытта тиэйэрбит. Итилэр тустарынан син сэрэтэллэр этэ. Үлэбитигэр араас омуктары кытта бииргэ сылдьыбыппыт. Фронтовиктар да бааллара. Фроҥҥа барарга тылланар дьоннору ыыппат этилэр. Кэлин бииргэ тутуспутунан барыаххыт дииллэрэ. Үчүгэй үлэм иһин махтал суругу биэрбиттэрэ. Итиннэ сулууспалыы сылдьан эмискэ иһим ыалдьан госпитальга киирэн ый курдук эмтэнэн үтүөрбүтүм. Чааспыт байыаннай комиссията бэрэбиэркэлээн баран, доруобуйабынан сулууспаттан босхолоон, дьиэбэр барарга быһаарбыта. Ити 1944 сыл сайыныгар этэ.
Дойдубар кэлэн үс эрэ хонукка сынньаммытым уонна колхозка үлэлиир буолбутум. Күһүнүн муҥхаҕа ыыппыттара (ас була диэн). Арбыҥҥа, Көбөкөҥҥө, Уус-Алдаҥҥа муҥха бөҕө буолбута. Аны 1945 сыл бэс ыйыгар Булуҥҥа муҥхара Тараҕай Арамаан салалтатынан барбыппыт. Бөүрүө Кумахха балаакканан түһэн олорон биэстии муҥханан балыктыырбыт. Дьэ, балык эгэлгэтин буолунай ыларбыт.
1945 сыллаахха кыһынын Кэбээйи сиригэр Чохулаахха үһүө бүолан дьаам сүүрдэн кыстаабыппыт. Сааскытын Арбыҥҥа дьэ төннүбүтүм. Оччолорго беһүөлэктээһин салҕанан барбыта. Миигин тутууга анаабыттара. 1978 сыллаахха пенсияҕа тахсыбытым. Онуоха дылы наар тутууга сылдьыбытым. Бочуоттаах сынньалаҥҥа тахсан да баран кыһалҕаттан кыралаан үлэлээбитим. Кэлин доруобуйам мөлтөөн үлэттэн тохтообутум.
1947 сыллаахха Сталин төбөлөөх медалы биэрбиттэрэ. Кэлин икки юбилейнай, биир үлэ ветеранын медалларын ылбытым. Кэргэним 1986 сыллаахха өлбүтэ. Аҕыс оҕолоохпут бары үлэһит буоллулар. Кырам Таня быраас үөрэҕэр сылдьар. Мария, Зоя учууталлар. Зарница маслозавод үлэһитэ. Саамай улахан кыыһым Нам остолобуойугар повардыыр. Уолаттарым үһүөн механизатордар. Ваня, Тима суоппардар, Алеша тракторист. 12 сиэннээхпин. Тулаайах бэйэм инчэҕэй тирбэҕэ быстыбатынан олорон, үлэлээн кэллим. Улуу Кыайыы өрөгөйдөөх 50 сыллаах юбилейын этэҥҥэ сылдьан үөрүүлээхтик көрсөр баҕа улахан.
Оҕолорум, ыччаттарым, дьонум-сэргэм, бука бары байылыаттык, эйэлээхтик олороргутугар баҕарабын. Чэгиэн-чэбдик, дьоллоох буолуҥ. Туругурдүн эйэ!