РУБРИКАТОР
БОЛЬНИЦКАЙ ГРИГОРИЙ НИКОЛАЕВИЧ
1921 сыллаахха Хатырык нэһилиэгэр төрөөбүт. Сэрии буолуон иннинэ ветеринар курсун бүтэрбитэ.
1942 сыл бэс ыйын 26 күнүгэр Хатырык нэһилиэгиттэн фроҥҥа барбыта. 1943 сыл саҕаланыыта ыалдьан армияттан төттөрү кэлбит. Фроҥҥа иккистээн ыыппатахтар.
1943-1954 сс. диэри маннык нэһилиэктэргэ ветеринардаабыта: Салбаҥ, Таастаах, Үөдэй, Хомустаах, Партизан, Никольскай, Хамаҕатта.
1953 с. Хамаҕаттаҕа ветеринардыы сылдьан, балтараа сыл ат баайыытынан дьарыктаммыт. Кини дьарыктаабыт «Сын-дыыс» диэн сүүрүк ата 1958 с. Дьокуускайга бэйэтин дистан-циятыгар бастаабыт.
1954 с. Көбөкөҥҥө көһөн кэлбиттэр. Бу кэмҥэ үлэлии сылдьан, ветеринардары үөрэтэр эбит. Ол курдук, Мухин, Кайгородов үөрэнэннэр өр сылларга ветсанитардаабыттар, тэҥҥэ үлэлэспиттэр. 1956 с. үтүө суобастаах үлэтин иһин Саха сирин үрдүкү наҕараадатын «Почетнай грамота» ылбыта. 1976 с. бочуоттаах сынньалаҥҥа тахсыбыта.
Кэргэнэ Мария Игнатьевналыын сэттэ оҕоломмуттара. Билигин оҕолоро, сиэннэрэ, хос сиэннэрэ Хамаҕаттанан, Дьокуускайынан, Чурапчынан, Көбөкөнүнэн олороллор.
Ахтыыны суруйда кыыһа Сивцева А.Г.