РУБРИКАТОР
Бочкарев Дмитрий Семенович
(1923-1945 сс.)
Наҕараадата: «Хорсун быһыытын иһин» мэтээл.
Дмитрий Семенович Үөдэй 4 кылаастаах оскуолатын бүтэрэн баран, Дьокуускайга трактористар куурустарыгар үөрэммит. Үөрэнэн баран I Хомустаахха тракториһынан үлэлээбит. ЫБСЛКС чилиэнэ. 1942 с. от ыйыгар Кыһыл Армияҕа ыҥырылларын туһунан бэбиэскэни Намнааҕы райвоенкоматтан туппут. Дмитрий Семенович «Хорсунун иһин» мэтээлинэн наҕараадаланарыгар толоруллубут докумуон көрдөрөрүнэн, 31-с стрелковай дивизия 75-с стрелковай полкатыгар таанканы утары охсуһар cэрии сэбигэр иккис нүөмэринэн сулууспалаабыт. Наҕараадалыыр лиискэ көстөрүнэн, Д.С. Бочкарев бэйэтин хорсун буойун быһыытынан көрдөрбүт. Ол курдук, 1945 сыл олунньу 18 күнүгэр ньиэмэстэри утары атаакаҕа киириигэ уонна Рауш диэн нэһилиэнньэлээх пууну ылыыга хорсун быһыыны көрдөрбүт: карабинынан бэргэн ытыыларынан тааҥка кэннигэр иһэр өстөөх үс саллаатын суох оҥорбут.
Сэриигэ барбыт ини-бии Бочкаревтартан саамай кыралара, эдэрдэрэ Дмитрий Семенович Бочкарев 1945 сыл кулун тутар 4 күнүгэр өстөөх арҕаҕын үрэйсэ сылдьан Германияҕа геройдуу охтубут, Польшаҕа Любань куоракка көмүллүбүт.