РУБРИКАТОР
СЭРИИ СУОХ БУОЛЛУН, ЧЭЧИРЭЭТИН ЭЙЭ
Нэһилиэк Советыгар секретардыы сылдьан уодаһыннаах сэрии иккис сылыгар Ийэ дойдубун көмүскэһэ фроҥҥа барбытым. Саха сириттэн тиийбит байыастар Челябинскайга сүүрбэччэ хонукка байыаннай үөрэххэ тохтообуппут. Балаҕан ыйын саҥатыгар фроҥҥа атаарыллыбыппыт. Айаннаабыт поезпыт Москваҕа эбиэттээбиппит кэннэ, тута, фроҥҥа илдьэ барбыта. Биһиги Калининскай фроҥҥа тохтообуппут.
Сэрии барбыт сирин ото-маһа күөрэ-лаҥкы түспүт зтэ. Онно окуопа хастан сыппыппыт. Өстөөх биһигиттэн чугас этэ. Миигин Бойко диэн командир ыҥыран илдьэ барбыта. Мин манна сэрии араас техникаларын, модун орудиелары көрөн сөхпүтүм уонна маннык күүстээх Армияны ханнык өстөөх хотуой диэн бөҕө санаа хатаммыта. Кылгас кэм иһигэр сыал ытыынан, тустуунан дьарыктаммыппыт. Онуо этибит. Ити эрчиллиибит бүппүтүн кэннэ биир күн разведкаҕа «тыл» ыла бардыбыт. Биһигиттэн өстөөх сыаптаан сытар сирэ чугас. Аара баран иһэн өстөөхтөрбүт уон киһилээх разведчиктарын бөлөҕөр кэтиллэ түстүбүт. Эрдэ билэн тоһуйа сытан өстөөх разведчиктарыттан сэттэтин өлөрөн, үһүн билиэн ылан штабпытыгар туттардыбыт.
Иккиһин үһүө буолан эмиэ «тыл» ыла бардыбыт. Кыра ойууру туоруурбутун кытта фашистар үлтү күөрэлээбит, умаппыт дэриэбинэлэрэ көһүннэ. Манна сыччах биир эрэ хоспох хаалбыт. Онтон дьоннор кэпсэтэр саҥалара иһилиннэ. Командирым миэхэ граната биэрэн баран, хоспоҕу чинчийэргэ бирикээстээтэ. Сыылан тиийэк сэттэ немец кэпсэтэ олороллорун көрөөт, дьоммор тарбахпынан биллэрдим. Кинилэр мин аттыбар сыылан кэлэн автоматтарын бэлэмнэнэн сыттылар. Командирбыт иһирдьэ олорооччуларга немецтии бэринэллэригэр модьуйда. Анарааҥылар сэттэ автоматтарын аанынан таһырдьа бырахтылар. Онон эрдэттэн бэйэлэрэ бэринэргэ быһаарынан кэлбит биир офицеры, алта саллааты тутан чааспытыгар аҕаллыбыт.
Алтынньы 15 күнүгэр Ржев куорат туһаайыытынан дэриэбинэни босхолооһуҥҥа атаакаҕа киирэн иһэн бааһыран охтубутум. Москва госпиталыгар эмтээн баран, салгыы Омскайга ыыппыттара. Ол кэнниттэн дойдубар кэлбитим.
Колхоһум дьоно - дьахталлар уонна кырдьаҕастар от оттоон, мас мастаан, сүөһү иитэн фроҥҥа барбыт буойуннары суохтаппакка олорбуттарын киэн тутта көрбүтүм.
Аймах билэ дьоммунуун бэйэм хааммын тоҕон көмүскээбит Ийэ дойдум чэчирии сайдарын баҕарабын.