РУБРИКАТОР
Аҕам буойун-саллаат
Мин аҕам, Азаров Филипп Иудович, 1900 сыллаахха Нам оройуонугар I Хомустаах нэһилиэгэр төрөөбүтэ. Артыал араас үлэлэригэр рабочайынан үлэлээбитэ. Аҕа дойду Улуу сэриитигэр 1942 с. күһүн балаҕан ыйын саҕана Граф биэрэгиттэн борохуотунан барбыттара. Кини сэриигэ мотострелковай этэрээккэ сылдьыбыта. Ол курдук Волга өрүскэ муоста оҥороннор, сэрии сэптэрин туораппыттарын кэпсиир этэ. Онно Үөдэй нэһилиэгин киһитинээн Татаринов Семен Семеновичтыын бииргэ сылдьыбыттар. 1945 сыллаахха сайын Кубалаах сайылыгар олордохпутуна, сэрииттэн тиийэн кэлбитэ. Сталинтан хас да Махтал суруктааҕа, “Бойобуой үтүөлэрин иһин” медаллааҕа. “Будапеһы ылыы иһин” медальга түһэриллибитин кэлиэ диэн кэтэһэр этэ. Сэрииттэн кэлэн баран, өр сыл сылгы биригэдьииринэн уонна сылгыһытынан үлэлээбитэ. Кулуну ылыыны 92% тиэрдэн Бочуотунай грамотанан уонна 20 миэтэрэ бэйбириэт таҥаһынан бириэмийэлэммитин умнубаппын.
Н.Ф. Азаров, 1990 сыл